Osy oraıda Almaty qalasynyń ákimi Erbolat Dosaev 2024 jyldyń jeltoqsanynda kúrdeli jóndeýden ótken Perınatologııa jáne balalar kardıohırýrgııasy ortalyǵynyń bazasynda qurylǵan ortalyqqa arnaıy baryp, jumysymen tanysty. Jańa ortalyqta damýynda túrli aýytqýy bar jáne shala týǵan balalarǵa keshendi qoldaý kórsetiledi.
Almaty ákimdigi men «Qazaqstan halqyna» qory muryndyq bolǵan biregeı joba medısınalyq kómekten bólek, áleýmettik jáne bilim berý qoldaýyn da qamtıdy.
Munda balalardyń úılesimdi ósýi men beıimdelýine jaǵdaı jasalǵan. Olarǵa abılıtasııa (jańa daǵdylardy damytý), kognıtıvti, motorlyq jáne kommýnıkatıvti qabiletin damytýǵa arnalǵan oqytý júrgiziledi.
Ortalyqtaǵy 426 sharshy metr aýmaqta biregeı terapevtik keńistikter qarastyrylǵan: shýngıt jáne tuzdy bólmeler, sensorlyq qabyldaýdy jaqsartýǵa arnalǵan ımmersııalyq vanna, sensorlyq bólme bar. Balalardy ońaltýǵa arnalǵan jeke baǵdarlamalardy kóp salaly mamandar toby ázirleıdi. Olardyń qataryna nevrolog, reabılıtolog, neonatolog, fızıoterapevt, EDSh dárigeri, logoped jáne defektolog kiredi.
Ortalyq kúnine 50 bala qabyldaı alady, al jylyna 600 balaǵa mindetti áleýmettik medısınalyq saqtandyrý (MÁMS) aıasynda kómek kórsetilmek.
Erbolat Dosaev ortalyqtaǵy qurylys jumystarynyń sapasyn kórip, merdigerge kózge urǵan kemshilikterdi joıýdy tapsyryp, oryndalýy qadaǵalanatynyn eskertti.
Ákim sondaı-aq jańartylǵan Perınatologııa jáne balalar kardıohırýrgııasy ortalyǵynyń emhanasynyń jumysymen tanysty. 1966 jyly salynǵan 1300,6 sharshy metrlik eki qabatty ǵımaratta kúrdeli jóndeý júrgizilip, ınjenerlik júıeler jańǵyrtyldy. Medısınalyq qyzmetti jyldam kórsetý úshin pasıentterdiń baǵyty ońtaılandyrylyp, múmkindigi shekteýli azamattar úshin qoljetimdilik artty. Atap aıtqanda, emhananyń keńistigi aımaqtarǵa bólinip, kabınetterdiń ornalasýy qaıta qaraldy, bul baspaldaqpen kóterilý nemese lıft paıdalaný qajettiligin azaıtty.
Almaty ákimi erekshe nazar aýdarǵan nysannyń biri – emhana bazasynda ornalasqan Uryq qorǵaý ortalyǵy. Munda týa bitken damý kemistikterin prenataldy dıagnostıkalaý jáne olardy túzetýge arnalǵan jatyrishilik operasııalar jasalady. Bul Almaty ákiminiń tapsyrmasymen jáne QR Densaýlyq saqtaý mınıstrliginiń qoldaýymen 2024 jyldyń 13 maýsymynda iske qosylǵan fetaldy hırýrgııanyń erekshe jobasy. Jyl saıyn bul ortalyqta 8 myńnan astam júkti áıel ýltradybystyq tekserýden ótedi.
Osy oraıda qala basshysy Perınatologııa jáne balalar kardıohırýrgııasy ortalyǵynyń ári qaraı damýy josparlanyp otyrǵanyn atady. Onyń ishinde «Aqyldy» operasııalyq bólmeler qurý, jyldyq qabyldaýdy 17 500-den 19 500 adamǵa deıin arttyrý, júrekke jasalatyn hırýrgııalyq otalardy qosqanda, operasııa túrlerin kóbeıtip, akýsherlik otalar sanyn jylyna 3 500-den 4 500-ge deıin arttyrý qarastyrylǵan.
Qazirgi tańda Perınatologııa jáne balalar kardıohırýrgııasy ortalyǵy – áıelder men balalarǵa tolyq sıkldi medısınalyq qyzmet kórsetetin iri klaster. Onyń ári qaraı jańǵyrtylýy jatyrishilik otasyn keńeıtýge múmkindik beredi, sondaı-aq damý kemistikterinen bolatyn múgedektik pen náreste ólimin 35%-ǵa tómendetýge yqpal etedi.
Aıta keteıik, Perınatologııa jáne balalar kardıohırýrgııasy ortalyǵynda júrgizilgen kúrdeli jóndeý jumystary – «Almaty qalasyn 2025 jylǵa deıin damytý baǵdarlamasy jáne 2030 jylǵa deıingi orta merzimdi keleshegi» aıasyndaǵy mańyzdy kezeńderdiń biri. Ǵımarattyń jalpy aýdany – 24,1 myń sharshy metrdi alyp jatyr.
