Foto: Kollajdy jasaǵan –Záýresh Smaǵul, «EQ»
Eńbek jáne halyqty áleýmettik qorǵaý mınıstrliginiń málimetinshe, jyl basynan elge qandastardyń 46,4% – Qytaıdan, 41% – О́zbekstannan, 7,1% – Túrikmenstannan, 1,9% – Reseıden, 1,6% – Monǵolııadan jáne 2% basqa elderden kelgen.
«Osy jylǵy 1 naýryzdaǵy jaǵdaı boıynsha eńbekke qabiletti jastaǵy etnıkalyq qonys aýdarýshylar sany 60,8%-dy, kámeletke tolmaǵandar 30,8%-dy jáne zeınetkerler 8,4%-dy quraıdy. Eńbekke qabiletti jastaǵy qandastardyń ishinen bilim deńgeıi boıynsha 16,8%-y joǵary bilimdi, 30,7%-y orta kásibı bilimdi, 50,8%-y jalpy orta bilimdi jáne 1,7%-ynyń bilimi joq», delingen habarlamada.
Etnıkalyq qazaqtar elimizdiń túrli óńirlerine qonystanǵan. Olardy ornalastyrý úshin eńbek kúshi tapshy Aqmola, Abaı, Qostanaı, Pavlodar, Atyraý, Batys, Shyǵys jáne Soltústik Qazaqstan oblystary belgilengen.
«Qonystandyrý óńirlerinde 2025 jylǵa arnalǵan qandastardy qabyldaý kvotasy 2 309 adamdy quraıdy. 2025 jylǵy 1 naýryzdaǵy jaǵdaı boıynsha qonystandyrý óńirlerine 389 qandas qonys aýdardy. Joǵaryda atalǵan óńirlerde qonystanǵan qandastarǵa kóshýge sýbsıdııa túrinde memlekettik qoldaý sharalary usynylady – bir mezgilde otaǵasyna jáne otbasynyń árbir múshesine 70 AEK (275,2 myń teńge) mólsherinde; turǵyn úı jaldaýǵa jáne kommýnaldyq qyzmetterge aqy tóleýge – bir jyl ishinde 15-ten 30 AEK (59-dan 118 myń teńgege deıin) mólsherinde», dep habarlady mınıstrliktiń baspasóz qyzmeti.
Aıta keteıik, jyl basynan beri 84 qandasqa túrli qoldaý sharalary kórsetilip, 56 adam turaqty jumysqa ornalastyrylǵan.
Sonymen qatar, qonystanýshylarǵa turǵyn úı satyp alý, salý nemese ıpotekalyq qaryzdyń bastapqy jarnasyn tóleýge ekonomıkalyq utqyrlyq sertıfıkaty beriledi. Bul sertıfıkat turǵyn úı qunynyń 50%-yn nemese bir otbasy úshin 4,56 mln teńgege deıingi somany óteýsiz jáne qaıtarymsyz negizde jabýǵa múmkindik beredi.
