Jarystyń qysqa baǵdarlamasynda Mıhaıl Shaıdorov asqan sheberligimen tánti etti. 20 jastaǵy almatylyq óren 94,77 upaı jıyp, úshinshi orynǵa taban tiredi. Eger asa kúrdeli ádis – úshtik akseldi oryndaý barysynda qoly muzǵa tımegen jaǵdaıda jerlesimizdiń óneri budan da joǵary baǵalanatyn edi. Desek te osy nátıjeniń ózi Shaıdorovqa Bostonda úzdikter qataryna qosylyp qana qoımaı, Olımpııa oıyndarynyń joldamasyna ıelik etýge jetkilikti boldy.
Báseke aıaqtalǵan bette BAQ ókilderine suhbat bergen Mıhaıl: «Sońǵy daıyndyq jumystaryn Vashıngtonda ótkizdim. Basynda biraz qıyndyq boldy. Uıqy kelmedi, tolqydym, qobaljydym. Biraq ol úırenshikti nárse. Eń bastysy, sonyń barlyǵyn jeńe bildim. Bul sporttyq mansabymdaǵy eń qıyn syrǵanaý boldy. Soǵan qaramastan alǵa qoıǵan josparym júzege asty. Alda búgingiden de aýyr synaq kútip tur. Eger erkin baǵdarlamada qatelikke boı aldyrmasam, kózdegen maqsatyma qol jetkizemin», dep aǵynan jaryldy.
Qysqa baǵdarlamanyń qorytyndysy boıynsha amerıkalyq Ilıa Malının kósh bastady. Byltyrǵy jylǵy álem chempıony 110,41 upaı oljalady. Ekinshi orynda – Iýma Kagııama. Olımpııa men Azııa oıyndaryna bir márte, álem chempıonattarynda úsh ret kúmispen kúptelgen Japonııanyń juldyzy 107,09 upaıdy enshiledi.
Áıelder arasynda baq synaǵan Sofıa Samodelkına da jaman syrǵanaǵan joq. Desek te onyń oryndaǵan elementteriniń kúrdeliligi kemshin soǵyp jatyr. Sonyń saldarynan qysqa baǵdarlamany 13-orynmen qorytyndylady. Jıǵan upaıy – 63.58. Burymdyldar básekesinde amerıkalyq Alısa Lıý (74.58 upaı) birinshi orynda tur. Japonııalyq Mone Tıba (73.44 upaı) men AQSh-tyń taǵy bir ókili Izabo Levıto (73.33 upaı) ekinshi, úshinshi satyǵa jaıǵasty.
