Nazym Qyzaıbaı Ulttyq ulan sapynda 2014 jyldan beri qyzmet atqaryp keledi. Ol – IIM Ulttyq ulannyń sport komandasyn daıarlaý ortalyǵynyń aǵa mamany.
Ulandyq sportshy jaqynda qazaq boksy tarıhyn jańartty. Serbııanyń Nısh qalasynda ótken álem chempıonatynda kezekti jeńisine qol jetkizip, úsh dúrkin jahan úzdigi atandy. Ol 2014, 2016 jyldary da álem birinshiliginde top jarǵan edi. Mundaı jetistikke tek áıelder emes, erler arasynda da birde-bir boksshymyz jetken emes.
Kezdesý barysynda ulandyq boksshy áriptesteriniń qurmetine bólendi. «Ońtústik» óńirlik qolbasshylyǵynyń qolbasshysy Talapker Ámireev chempıon qyzǵa Alǵyshat pen gúl shoǵyn, estelik syı-sııapat tabystady. Elimizdiń quqyqtyq tártip áskeriniń namysyn halyqaralyq deńgeıdegi saıystarda abyroımen qorǵap júrgeni izin basqan áriptesterine úlgi ekenin jetkizdi.
N.Qyzaıbaı sarbazdar men sardarlarǵa kórsetken iltıpaty men jyly lebizderi úshin alǵys bildirdi. «Búgingi kezdesý óte qyzyqty ótti. Ulttyq ulan ár kez qoldaý bildirip keledi. Maǵan bul – úlken demeý ári mártebe. Ony joǵary baǵalaımyn. Aldaǵy ýaqytta da sizderdi jarqyn jeńisterimmen qýantýǵa barymdy salamyn», dedi úsh dúrkin álem chempıony. Nazym Abaıqyzy áskerı bólimniń qurmetti qonaqtar kitabyna estelik qoltańba qaldyrdy.
