Bala jastan ónerge, tehnıkaǵa jýyq Talǵat Rústemuly Túrkistan qalasynda beıneleý óneri jáne dızaın fakýltetinde bilim alǵan. Qyzylorda óńiriniń týmasy bolǵanymen, qaıbir jyldary Shyǵystyń Shemonaıha qalasyna kóship kelipti. Munda qazir kóliktiń júrý bóligin jóndeıdi, kishigirim tehnıkalar qurastyrady. Temirden túıin túıip, tas qashaıtyn óneri jáne bar.
– Otandyq kóligimiz bolsa degen armanym – aspandaǵy aı emes. Kirissek, qolymyzdan keletin is. Qazir kerek-jaraqtyń bári bar. Burynǵy sýretshiler sekildi boıaýdy shópten jasap, shedevr týǵyzýdyń keregi joq. Tek eńbek etýimiz kerek. Áıgili «Rols Roıs» kompanııasynyń irgesin qalaǵan Charlz Rolls ta qarapaıym sharýanyń balasy edi. Kedeıliktiń kebin kıip júrip, álemge áıgili mashına jasady, – dep óz-ózin jigerlendirip qoıdy ónertapqysh Talǵat Rústemuly.
Keıipkerimiz qurastyryp jatqan kóliginiń dızaınyn da ózi syzyp, jasap jatyr. Tehnıkasynyń poshymyna ǵana emes, sapasyna da mán bergen. Júris bóligindegi keıbir temirlerdiń arasyna sý jınalyp, shiritpeýi úshin de sańylaýlar jasaǵan. Ondaıdy alpaýyt kólik qurastyrý zaýyttary oılaı bermeıdi deıdi. Qyl aıaǵy jaryq shamdaryna deıin qoldan jasaýǵa bekingen. Asa uqyppen qolǵa alǵan mashınasyn kúzge qaraı aıaqtap, ózi tizgindeıdi. Qujattaryn da zańdastyryp alatynyn aıtady.
– Quraýdyń jóni osy dep, temirlerdi dánekerleı bermeımin. Ár detaldiń esebi bar. Eń áýeli qaýipsizdikti alǵa qoıdym. Odan soń jaılylyq. Dızaın jaǵy da úılesip turýy kerek. Qozǵaltqyshtyń kólemi – 3,9. Demek jolsyz jerlermen de júrýge qýatty. Júrý bóliginiń detaldaryn túgeldeı derlik qoldan jasadym, – deıdi sheber.
Aıtyp ótkenimizdeı, Talǵat sheber kólikten basqa da tehnıkalardy qoldan qurap alady. Tapsyryspen aýyldastaryna qurap ta beredi. Qazir sheberhanasynda kólikten bólek beton ezetin qurylǵyny da qalqaıtyp qoıǵan. Biraq uly armany – qazaqtyń kóligi. Eger otandyq mashına shyǵyp jatsa, ulttyq órnek qosyp, álemdik naryqqa shyqsaq dep qııalyna erik bergen. Bálkim, erteń-aq oryndalatyn arman.
Shyǵys Qazaqstan oblysy,
Shemonaıha qalasy
