Rekord avtory – Nemat Narhojaev. «Kamal ata» dámhanasynyń bas aspazy. Onyń sózinshe mundaı samsa pisirý ońaı emes, sol úshin eki aptadaı daıyndalypty. Degenmen onyń kádimgi samsadan esh aıyrmashylyǵy joq ekenin aıtady. Qamyry da, ishindegi qospasy da birdeı. Tek kólemi ǵana úlken. Aspaz birinshi kezekte úıinde pisirip kórgen. Onysy 17 kılo shyqqan. Al festıvalda, joǵaryda aıtylǵandaı 24 kılo etip pisirdi.
Jalpy, «DámDásTour» festıvali Shymkentte 2022 jyldan beri ótip keledi. Is-shara qala turǵyndary men qonaqtaryna erekshe unap qalǵandyqtan, jergilikti ákimdik ony jyl saıyn uıymdastyrýdy uıǵarǵan. Mundaǵy maqsat – shahardyń burynnan kele jatqan dástúrli taǵamdary men qonaqjaılylyǵyn nasıhattap, elge týrıster tartý. Shymqala óziniń baı ashanasymen tanymal. Ony mundaı dárejege kótergen ońtústik ólkedegi túrli mádenıetterdiń bir-birimen toǵysýy. Ári mol dastarqan qazaq halqynyń keń peıili men darqan kóńiliniń bir kórinisi ispetti.
Festıvalda qalanyń elýden astam dámhanasy men tamaq ındýstrııasyndaǵy kásiporyndary qatysyp, óz ónimderin kelýshiler nazaryna usyndy. Sondaı-aq jergilikti qolónershiler de óz buıymdaryn qonaqtarǵa tanystyrdy. Sonymen birge mereke aıasynda motosporttyq is-shara uıymdastyryldy. Respýblıkanyń ár óńirinen jáne Qyrǵyzstan, О́zbekstan, Tájikstan elderinen kelgen motobaıkerler ózderiniń erekshe qyzyqty motoshoýy men motosherýin ótkizdi.
Festıval otshashý men estrada juldyzdarynyń merekelik konsertine ulasty.
ShYMKENT
