Osy taqyrypqa qatysty máseleler Prezıdent is basqarmasynyń Prezıdenttik ortalyǵynda ótken gıdter men ekskýrsııa jetekshileriniń I forýmynda aıtyldy. Basqosýdy Astana qalasynyń ákimdigi, «Astana damý ortalyǵy» JShS, Astana gıdter klýby, Qazaqstannyń gıdter jáne ekskýrsovodtar odaǵy, «Kazakh Tourism» UK» AQ birlesip uıymdastyrdy. Jıynǵa Astana qalasynda týrısterge ekskýrsııa jasaýmen aınalysyp júrgen 100-den asa azamat qatysty. PIB Prezıdenttik ortalyǵy dırektorynyń orynbasary Botagóz Qaıypova ekskýrsııa jetekshileriniń arqasynda Prezıdenttik ortalyqqa keletin qonaqtardyń kóbeıgenin atap ótti.
– Sapaly týrıstik servıs qurý bilikti kadrlar daıarlaý isimen de tyǵyz baılanysty. Iаǵnı týrısterge eldiń baı murasyn durys kórsete alatyn gıdterdiń jumysyn eleýsiz qaldyrýǵa bolmaıdy. Gıd-ekskýrsovod jaı ǵana jol kórsetýshi emes, ol – qonaqtardyń sanasyna elimiz týraly jaqsy oı qalyptastyratyn «mádenı elshi». Demek, qonaqtardyń sapary sátti bolmaǵy gıdterdiń kásibıligine, bilimine, sheberligine, tipti jeke qasıetterine de baılanysty. Joǵary bilikti gıd eldiń tarıhyn, mádenıetin, etnografııasyn jáne geografııasyn jaqsy bilýge tıis. Prezıdenttik ortalyq elordanyń eń mańyzdy týrıstik nysandarynyń biri retinde mádenı týrızmdi damytýǵa erekshe kóńil bóledi. Ekskýrsııa jetekshileriniń kásibıliginiń arqasynda ortalyq elimizdiń saıası tarıhyna qyzyǵýshylyq tanytqan jastarǵa, zertteýshilerge, dıplomatııalyq delegasııalarǵa, týrısterge arnalǵan mádenı oshaqqa aınalyp keledi, – deıdi B.Qaıypova.
Astana qalasy Investısııalar jáne kásipkerlikti damytý basqarmasy basshysynyń orynbasary Maqsat Jańabaevtyń aıtýynsha, byltyr elordaǵa kelgen týrıster sany 2023 jylmen salystyrǵanda 14% -ǵa ósip, 1,5 mln adamdy quraǵan. Olardyń ishinde Qytaı, Túrkııa, Reseı, Úndistan, Germanııa, Ońtústik Koreıa, AQSh-tan kelgen qonaqtardyń úlesi basym. Demek, qazir Astanada qazaq, orys, aǵylshyn tilin biletin gıdterden bólek, qytaı, koreı, úndi, túrik tilin biletin gıdterge de suranys joǵary. Atalǵan elderden týrıster top bolyp kelgen soń, olar sapardyń basy-qasynda kásibı maman júrgenin qalaıdy. Osy sheteldik qonaqtarǵa eldiń týrıstik áleýetin barynsha aıshyqtap kórsetýge kelgende gıdter men ekskýrsııa jetekshilerin attap óte almaımyz. О́ıtkeni olar saparlaǵan ólke týraly mazmundy aqparat usynǵannan bólek, týrıster qyzyǵatyn oryndardy jaqsy biledi. Biz qazir oqyǵan, kýrstan ótken, salany uńǵyl-shuńǵylyna deıin zerttegen gıdter týraly aıtyp otyrmyz. Olardyń jumysyna oqymaǵan, oqysa da birdi-ekili kýrstan ótip jumys istep júrgender kedergi bolmaýǵa tıis. Osy rette «Kazakh Tourism» UK» AQ basqarma tóraǵasynyń orynbasary Danıel Serjanuly bylaı deıdi:
– Sheteldik týrısterdi qarsy alatyn birinshi adam – gıd. Gıdter qonaqtardyń sapary maǵynaly, mazmundy bolýyna áser etedi. Qazir bul baǵytta eńbektenetin mamandardyń turaqtap qalmaıtyny qynjyltady. 10 adam gıdtiń oqýyn oqyp, kýrstardan ótse, onyń tórteýi jumys isteıdi delik. Sol tórteýdiń ózi birer jylda basqa salaǵa aýysyp jatatyn sátter jıi kezdesedi. Elimizdiń týrıstik áleýeti artyp kele jatqanyn eskersek, gıdterdiń, ekskýrsııa jetekshileriniń mártebesin qazirden kóterýimiz kerek. Máselege «Kazakh Tourism» AQ beıjaı qarap otyrǵan joq. Gıdter men ekskýrsııa jetekshileriniń basyn qosatyn sıfrlyq platforma ázirlenip jatyr. Gıd mamandar osy arqyly bir jerden oqyp, kerek aqparatyn taýyp, oǵan qosa onyń qyzmetin rastaıtyn jeke beıdjin ala alady. Iаǵnı basymdyqqa ıe bolady. Beıdjben árbir týrıstik nysanǵa tegin, emin-erkin kiredi. Budan basqa, zańnamalyq turǵyda gıdterdiń mártebesin, negizgi quqyqtaryn bekitý jóninde de jumys júrip jatyr. Sonyń nátıjesinde, qonaqtarǵa jol silteıtin, sapaly, mazmundy, ónimdi qyzmet kórsetetin mamandardyń sany artady dep oılaımyz.
Gıd bolyp jumys istep júrgen jastar suranysqa ıe bolýdy oılasa, áýeli oqý máselesine qatysty talaptardy oryndaýy kerek. Mysaly, shaǵyn kýrstarmen shektelip, keshe jumysqa kirisken jas qalanyń tarıhy, negizgi týrıstik baǵyttary týraly aqparatty dál tájirıbeli maman sekildi bilmeıtini anyq. Sondyqtan oqyǵan, óz jumysyn jaqsy biletin gıdterdiń, ekskýrsııa jetekshileriniń mártebesin kóterip, olardy resmı tirkelgen gıd retinde dárejesin arttyrý quptarlyq is. Osylaısha, oqymaı, óz betinshe jumys istep kelgen gıdter ysyrylyp qalady nemese suranysta bolýy úshin jańa talaptardy oryndaýǵa bel býady. Elimizdiń Almatydan bólek, barlyq derlik óńirinde týrıstik maýsym qysqa. Kúz, qysta ulttyq parkterge, tarıhı-mádenı oryndarǵa baratyn qonaqtar azaıady. Sol úshin de gıd bolyp jumys istep júrgen jastardyń kópshiligi salany qosymsha jumys retinde qarastyrady.
Kezdesýde qonaqtar osy máselemen qatar gıdter men ekskýrsııa jetekshilerin kásibı daıarlaý, bedelin arttyrý, qoǵamdyq birlestikterdiń usynatyn jeńildikteri, qarjylyq qyzmet, salyq máseleleri týraly da sóz qozǵady.
