Atyraý qalasyndaǵy ákimshilik quqyq buzýshylyqtar jónindegi mamandandyrylǵan sotynyń materıalynda kórsetilgendeı, 4 adamǵa QR Ákimshilik quqyq buzýshylyq týraly kodeksiniń 434-babynyń 1-bóligimen (Usaq buzaqylyq) aıyp taǵylǵan.
«2025 jylǵy 23 naýryzda azamatshalar N., A. jáne kámelet jasyna tolmaǵan H. men A. Atyraý qalasyndaǵy muz aıdyny saraıynyń ǵımaratynda arab tilindegi jazýy bar Qazaqstan Respýblıkasynyń Týymen sýretke túsken. Sýretti áleýmettik jeli arqyly taratyp, usaq buzaqylyq jasaǵan. Olardyń kinási ákimshilik quqyq buzýyshylyq týraly hattamamen, fotosýretpen, baıanatpen jáne basqa da is materıaldarymen tolyq dáleldendi», dep habarlady atalǵan sottan.
Sot qaýlysymen quqyq buzýshylar aıyp taǵylǵan bappen kináli dep tanyldy.
«N.-ǵa kámeletke tolmaǵan adamdy ákimshilik quqyq buzýshylyqqa tartý, adamdar tobynyń ákimshilik quqyq buzýshylyq jasaýy sekildi jaýaptylyǵyn aýyrlatatyn mán-jaı eskerilip, 15 táýlikke ákimshilik qamaqqa alý túrindegi ákimshilik jaza qoldanyldy. A.-ǵa ákimshilik jaza retinde 78 myń 640 teńge, kámeletke tolmaǵan H. men A.-nyń zańdy ókiline 39 myń 320 teńge ákimshilik aıyppul salyndy», dep málim etti sottan.
Sot qaýlylary zańdy kúshine engen joq.
