Foto: Májilis
Qaraqat Jaqsylyqqyzynyń aıtýynsha, depýtattar aýyl turǵyndarymen kezdesýlerde mehanızatorlar, agronomdar, saýynshylar, veterınarlar jetispeýshiligi týraly shaǵymdardy estıdi eken.
«Salada 60 myńnan astam maman jetispeıdi. Árbir úshinshi ferma kadr tapshylyǵyn bastan ótkerip otyr, ásirese Soltústik Qazaqstan, Aqtóbe, Jambyl, Almaty oblystary. Jastar aýyldan ketip jatyr», dedi depýtat.
Q.Ábdenniń pikirinshe, búginde jastardy oqytyp qana qoımaı, olar ózderiniń qabiletterin týǵan jerinde iske asyrýy úshin jaǵdaı jasalýy qajet.
«Mamandardy daıarlaýdyń negizi «Qaı jerde týǵan - sol jerde paıda boldy», qaǵıdaty bolýy tıis. Sheshim – mektepterde agrokásiptik bilim berý engizilip, 7-11 synyptar aralyǵynda oqýshylar mehanıkalandyrý, agronomııa, veterınarııa, mal sharýashylyǵy jáne agrobıznes negizderin úırenýi qajet», dedi Májilis depýtaty.
Depýtattyń aıtýynsha, mektepterde agroprofıldi oqytý nátıjeli bolar edi. Erte kásiptik baǵdar arqyly oqýshylar suranysqa ıe mamandyqtarǵa ıe bolady. Teorııa jergilikti aýyl sharýashylyǵy kásiporyndarynda praktıkamen bekitiledi. Sol aýyl jergilikti sharýashylyqtyń erekshelikterin biletin mamandardy alady.
Májilismenniń aıtýynsha kóp elderde aýyl sharýashylyǵy úshin kadrlar daıarlaý – mektepten bastalady.
«Germanııada oqýshylar aýyl sharýashylyǵy kásiporyndarynda tájirıbeden ótedi, al memleket olardyń oqýyn sýbsıdııalaıdy. Kanadada agromektepter zamanaýı tehnologııalarǵa basymdyq bere oqytyp, kadrlar tapshylyǵyn edáýir azaıtyp otyr. Avstralııada aýyl sharýashylyǵyn júrgizý úshin jeńildetilgen nesıeler-granttar arqyly mektep túlekterine qoldaý kórsetetin «О́z óńirińde oqy jáne jumys iste» baǵdarlamasy engizilgen», dedi depýtat Q.Ábden.
Depýtattyń kózqarasynsha, atalǵan halyqaralyq tájirıbe, ıaǵnı, orta mektepterde kadrlardy júıeli daıarlaý – aýyl sharýashylyǵyn damytýdyń jalǵyz tıimdi joly. Sol oraıda, Úkimetke usynystaryn aıtty.
«1. Bilim mınıstrligi – aýyldyq mektepterde agroprofıldi oqytýdyń memlekettik baǵdarlamasyn ázirlesin.
- Aýyl sharýashylyǵy mınıstrligi – mektepterdiń dýaldi oqytý úshin aýyl sharýashylyǵy kásiporyndaryna qoljetimdiligin qamtamasyz etsin.
- Eńbek jáne halyqty áleýmettik qorǵaý mınıstrligi – AО́K-de jumys isteýge daıyn túlekter úshin jeńildikter men granttar júıesin engizsin.
- Ulttyq ekonomıka mınıstrligi – bul baǵdarlamany aýyldy damytý jónindegi ulttyq jobalarǵa engizsin», dep saýalyn aıaqtady depýtat.
Qaraqat Ábden «Aýyl» fraksııasy atynan Úkimetti máseleni sheshýdi keıinge qaldyrmaı, qysqa merzimde mektepterde agroónerkásiptik bilim berýdi engizý jóninde naqty sharalar usynýǵa shaqyrdy.
