Qazirde aýdan ortalyǵyndaǵy negizgi kóshelerdi jańǵyrtý jumystary júrgizilip jatyr. Qabanbaı kóshesiniń kireberis qaqpasynan ortalyq stadıonǵa deıingi 2 shaqyrymǵa jýyq joldy 4 jolaqty etip keńeıtý jumysy bastalyp ketipti. Aýdan ákimi Ersin Eskendirovtiń aıtýynsha, joldyń eni 13 metrge deıin ulǵaıtylyp, asfalt jamylǵysy tóselmek. Joba aıasynda uzyndyǵy 1,5 shaqyrym bolatyn jaıaý júrginshiler joly jóndelip, 6 shaqyrymdy quraıtyn kóshe boıyna 200-ge jýyq jaryq baǵanasy ornatylmaq.
Sonymen qatar Aqsýat aýylyndaǵy kópqabatty turǵyn úılerdiń qasbetterin jańartý jumysy da nazarda. Aldaǵy ýaqytta Qabanbaı kóshesindegi 16 páterli, ekiqabatty turǵyn úı jańa stılde, metall saıdıngpen qaptalyp, kósheniń sánin kirgizbek.
Búginde Aqsýat aýdanynda 19 mektep jumys istep tur. Birazyna kúrdeli jóndeý qajet. Sonyń biri – aýdanǵa eń jaqyn ornalasqan, Ekpin aýylynyń Ysqaq Kabekov atyndaǵy bilim ordasy. Mektep 1991 jyly salynǵan, qazir onda 330 oqýshy bilim alyp jatyr. Sport zalynyń tóbesinen sý aǵyp, betony shirigen. Qyzmetkerlerdiń aıtýyna qaraǵanda, sportzal 2021 jyly apatty dep tanylyp, sodan beri jabyq tur. Mekteptiń keıbir bóliginiń syrtqy qabyrǵalary da jaryla bastaǵan. Bir qyzyǵy, bul mektepte belgili kásipker, Harvard ýnıversıtetiniń túlegi, jyl saıyn Aqsýat aýdanynda aıtys uıymdastyratyn mesenat Dýlat Tastekeev bilim alypty.
Múmkin alda osyndaı kásipker azamattardyń qoldaýy bolyp qalar dep úmittenedi aýyl jurtshylyǵy. Aımaq basshysy óńirde apatty jaǵdaıda turǵan birneshe mektep bar ekenin aıta kele, bul bilim ordalaryna birinshi kezekte kóńil bólinetinin málim etti.
«Qala men aýyl mektepteri arasynda alshaqtyq bolmaýǵa tıis. О́ńirdegi mektepter oqýshylarǵa zaman talabyna saı sapaly bilim men tárbıe berýi qajet. Ekpin aýylyndaǵy mekteptiń jaǵdaıyn burynnan bilemin. Jańa mektep salý máselesin qarastyramyz», dedi oblys ákimi.
Oıshilik aýylyndaǵy Toǵas batyr orta mektebi 1970 jyly salynǵan. Munda qazir 326 bala oqyp jatyr, 78 muǵalim eńbek etedi. Bilim ordasy 2022 jyly kúrdeli jóndeýden ótti.
«Oıshilik aýylynyń oqýshylary sportta únemi jaqsy nátıje kórsetip júr. Eldi mekenge tek jaqsy sport kesheni jetispeı tur. Bul másele aýyl turǵyndary tarapynan kópten beri aıtylyp keledi. Osy problemanyń sheshilýine kómektesseńiz degen tilegimiz bar», dedi aýyl turǵyndary. Aımaq basshysy turǵyndardyń ótinishin óz baqylaýyna alyp, qoldaý kórsetetinin aıtty.
«Aqsýat» kommýnaldyq kásiporyny 14 aýyldy aýyzsýmen qamtamasyz etedi. Sondaı-aq aýdannyń 32 eldi mekenindegi 460 shaqyrymnan astam avtomobıl joldaryn kútip ustaý jumysyn júrgizedi. Mekemeniń materıaldyq-tehnıkalyq bazasy jyl saıyn jańartylyp otyrady. 2023 jyly 178 mıllıon teńgege 6 arnaıy tehnıka, byltyr 247 mıllıon teńgege 4 tehnıka satyp alynǵan. Kásiporynda 103 adam jumys isteıdi. Olardyń qaramaǵynda 26 arnaıy tehnıka bar.
Oblys ákimi kommýnaldyq kásiporynnyń aýdan úshin mańyzdy nysan ekenin, sonymen qatar tehnıkalardyń sanyn arttyrý baǵytyndaǵy jumysty jalǵastyrý qajettigin aıtty. «Halyqqa sapaly kommýnaldyq qyzmet kórsetý – basty mindet. Joldardy qysy-jazy kútip ustaý, sý jáne káriz júıesiniń úzdiksiz jumys isteýi turǵyndardyń ómir sapasyna tikeleı áser etedi», dedi B.Ýálı.
Aımaq basshysy arnaıy at basyn burǵan nysandardyń biri – Aqsýattaǵy kásiptik kolledji. Bul 1959 jyldan beri talaı aqsýattyq bilim alǵan ulaǵatty bilim uıasy sanalady. Qazir munda 314 stýdent oqıdy, 49 muǵalim jumys isteıdi. Kolledj aýmaǵynda 120 oryndyq jataqhana, oqý-óndiristik zerthana ǵımaraty ornalasqan. Zerthana stýdentterdiń teorııalyq bilimin tájirıbemen ushtastyrýyna múmkindik beredi. Kolledjde stýdentter 4 mamandyq, 7 biliktilik boıynsha bilim alyp jatyr. Mamandar daıarlaýǵa 41 ınjener pedagog tartylǵan. Oqý orny aýyl sharýashylyǵy salasyna qajetti kadrlardy daıarlaýǵa erekshe nazar aýdarady. Aıagóz, Aqjar, Kókpekti, Zaısan aýdandarynan stýdentter kelip oqıdy. Kolledj stýdentterin jumyspen qamtý deńgeıi – 98%. Oqý orny Jumysshy mamandyqtary jylyna oraı jeti jańa mamandyq ashýǵa ótinish berip otyr. Onyń ishinde aýyldyq jerde suranysqa ıe gıdrotehnık, veterınarlyq dáriger sııaqty mamandyqtar bar. Bilim ordasyn jabdyqtaý, qajetti qural-jabdyqtarmen qamtamasyz etýge 400 mıllıon teńge ınvestısııa tartylǵan.
«Qazirgi ýaqytta oblystaǵy 33 kolledjdiń zaman talabyna saı jabdyqtalýyna erekshe den qoıylyp otyr. Aqsýat kolledji aýyl sharýashylyǵy salasyndaǵy mamandardy, eńbek adamdaryn daıarlaıdy. Mundaǵy elektr qýaty men ınternet máselesiniń sheshimin tabý joldaryn qarastyramyz. Kolledjdiń materıaldyq bazasyn nyǵaıtýǵa, bilim sapasyn arttyrýǵa baǵyttalǵan jobalardy da qoldaımyz», dedi aımaq ákimi.
Aımaq basshysy aýdanǵa jumys sapary barysynda Aqsýat, Oıshilik, Qumkól, Kókjyra aýyldarynyń tynys-tirshiligimen tanysyp, turǵyndarymen kezdesti. Qumkól aýylyna kireberistegi kópirdi salý jobasy pysyqtaldy. Aýdan ákimi Ersin Eskendirovtiń aıtýynsha, Tebiske ózeninen ótetin kópir qaıta salynady. Qurylysty bıyl sáýir aıynda bastap, 2026 jyly qyrkúıek aıynda aıaqtaý josparlanǵan. Sonymen qatar Aqsýat pen Oıshilik aýyldarynyń arasyn jalǵaıtyn 30 shaqyrymnan astam joldyń 7 shaqyrymyna asfalt tóseledi. Joldyń kelesi bóligin jóndeýge jobalyq-smetalyq qujattama ázirlenip jatyr.
Qumkól aýylyna salynatyn kópirdiń jobasyn tekserý barysynda oblys ákimi aýyl aqsaqaldarymen kezdesti. Aýyl qarttary 70-jyldary salynǵan kónergen kópirdiń qaıta salynatynyna rızashylyqtaryn bildirdi.
«Kópirdiń ábden tozyǵy jetken. Jańa kópir salynsa dep júrgenimizge biraz boldy. Endi mine, bul oıymyzdyń oryndalatyn túri bar. Osyndaı ıgi bastamalar kóbeıe bersin», dedi aýyl aqsaqaly Erkin Tólegetaev.
Kókjyra aýylynyń turǵyndary mádenıet úıiniń qajet ekenin alǵa tartty. Oblys ákimi Kókjyra aýyl sharýashylyǵy damyǵan, áleýeti joǵary aýyl ekenin aıta kelip, oǵan Mádenıet úıiniń qajettigin burynnan biletinin, máseleni sheshý joldaryn qarastyratynyn jetkizdi.
«Oblystyń 10 aýdany men 2 qalasyn aralap, máselelerimen tanystym. О́ńirde birneshe jobalardy iske asyrý josparlanyp otyr. Joldar jóndeledi, kópirler salynady, jańa áleýmettik nysandar boı kóteredi. Bul jumystar oblystyń barlyq aýdandarynda júzege asyrylady. Arnaıy jol kartasy bar. Soǵan sáıkes tıisti jumystar qolǵa alynady», dedi aımaq basshysy.
Abaı oblysy
