Kollajdy jasaǵan – Qonysbaı ShEJIMBAI, «EQ»
Aldaǵy jyldary oblysta arnaıy tehnıkanyń júrgizýshileri, dánekerleýshiler, qurylys mamandyqtarynyń jumysshylary men tehnıkalyq baǵyttaǵy mamandarǵa suranys artady degen boljam bar.
– Olardyń 75%-dan astamy, ıaǵnı shamamen 48,4 myń adam kásiptik-tehnıkalyq bilim alǵan mamandar. Aldaǵy úsh jylda jumys kúshine suranys jyl saıyn 10-11%-ǵa ósedi dep kútilip otyr, – deıdi óńirlik jumyspen qamtýdy úılestirý jáne áleýmettik baǵdarlamalar basqarmasynyń basshysy Almıra Dısıýpova.
Qazir oblysta jańa jumys oryndaryn qurýǵa erekshe nazar aýdarylyp otyr. Jyl basynan memlekettik baǵdarlamalar men jeke bastamalar aıasynda 4 156 jumys orny qurylǵan. Turaqty jumys oryndary bilim berý (10,7%), aýyl sharýashylyǵy (9%), densaýlyq saqtaý (8%), ónerkásip (7%) salalarynda kóp. Jalpy jergilikti jumyspen qamtý oryndary bıyl 26,7 myń adamdy jumysqa ornalastyrýdy josparlap otyr. Onyń ishinde 18,3 myń adam turaqty jumys oryndaryna, 8,4 myń adam ýaqytsha jumys oryndaryna ornalasady.
– Eń kóp suranys ónerkásip, kólik jáne qoımalaý, qyzmet kórsetý, bilim berý, densaýlyq saqtaý salalaryna bolady. Bir ǵana ónerkásip salasy aldaǵy bes jylda 11 myńnan astam tehnıkalyq mamandy qajet etedi. Sondyqtan aldaǵy ýaqytta bilim berý uıymdaryna tapsyrysty ulǵaıtý, mamandardy qaıta daıarlaý, jumyssyz azamattardy oqytý tásilderi júıelene beredi. Bul óńirdiń uzaqmerzimdi ekonomıkalyq damýyna barynsha yqpal etetin mańyzdy faktor. Atalǵan is-sharalardyń júzege asýy aımaq halqynyń tabysyn arttyrýǵa, kásipkerlik belsendilikti jandandyrýǵa, áleýmettik ál-aýqatty jaqsartýǵa oń áserin tıgizedi, – deıdi A.Dısıýpova.
Jumyssyz azamattardy oqytý – kadr qajettiligin jabýdyń mańyzdy qadamdarynyń biri. Bıyl qysqamerzimdi kásibı oqytý kýrstarymen 425 adamdy qamtý josparlansa, olardyń 360-y bilim berý uıymdarynda, al 65-i jumys ornynda jumys berýshilermen oqytylmaq. Búginde jumys berýshilerden ótinish qabyldanyp jatyr. Skills Enbek platformasynda onlaın oqytý arqyly 2 000 jumyssyz azamatty qamtý oıda bar. Oqý aıaqtalǵannan keıin olar sáıkes sertıfıkattar alady. Jalpy atalǵan platformada 858 kýrs qoljetimdi, onyń ishinde 311-i tegin. Eńbek mınıstrliginiń málimetterine súıensek, bıyl VR, AR tehnologııalaryn qoldanatyn jańa kýrstar da qoljetimdi bolady. Vırtýaldy shyndyq (VR), tolyqtyrylǵan shyndyq (AR) bilim berý ortasyn aıtarlyqtaı jaqsartýǵa kómektesedi.
– Jumyspen qamtýǵa járdemdesýdiń taǵy bir baǵyty – áleýmettik osal toptarǵa qatysty azamattardyń kásipkerlik bastamalaryn qoldaý maqsatynda 400 aılyq eseptik kórsetkish kóleminde memlekettik granttar berý. Jyl sońyna deıin osyndaı 406 grant berý josparda bar. Ekinshiden, bos jumys oryndarynyń jármeńkeleri de jalǵasady. Mansap ortalyqtary jyl basynan 25 jumys jármeńkesin ótkizip, oǵan 975 adam qatysqan. Nátıjesinde, jumys izdegen azamattardyń 142-si jumysqa ornalasty, – deıdi basqarma basshysy.
Pavlodar oblysy
