Mysaly, jýyrda qasıetti Ramazan aıynda izgi amal jasaýdy dástúrge aınaldyrǵan túrkistandyq jastar 4 bólmeli úıdi Asylbekovter otbasyna tabys etti. Jyldaǵy úrdis boıynsha Túrkistan qalasy «Bekzat» shaǵyn aýdanynyń 1994 jyly týǵan er-azamattary, ıaǵnı úsh mekteptiń 150-den asa túlegi aýyzbirshilik tanytyp, baspana salyp, ony turmystyq tehnıkalarmen jabdyqtaǵan. Qurylys jumystarynyń basym bóligin óz kúshimen asarlatyp júrgizgen. Jastardyń arasynda qurylys jumystaryn jetik meńgergender belsendilik tanytqan. Osylaısha, jınalǵan qarjyny únemdeýge, tıimdi jumsaýǵa jaǵdaı jasalǵan.
Qurylys jumystary tolyq aıaqtalǵan soń baspanaǵa muqtaj jandardy anyqtaýda shaǵyn aýdan turǵyndarynyń, qala ákimdiginiń keńesine júgingen. Sondaı-aq kópshiliktiń usynys-pikirin eskergen. Tórt bólmeli úıdi alǵan Qurbanáli Serikbaıuly men Móldir Farhatqyzy 9 perzentimen birneshe jyldan beri páter jaldap kúneltip kelgen eken. Qaıyrymdy istiń sharapatyn kórgen otbasy jaqsylyqqa jany qumar jandarǵa alǵysyn bildirdi.
Baspanany tabys etý rásimine qatysqan aýyl aqsaqaly Dáýletkereı Ospanov, Bekzat Sattarhanovtyń anasy Syrlykúl Adyrbekqyzy jáne el aǵalary, máslıhat depýtattary quttyqtaý sóz sóılep, izgi tilegin arnady. Al ıgi isti uıymdastyrýshylardyń biri Beksultan Ábishov ata-babamyz osyndaı qysqa jip kúrmeýge kelmeıtin qysyltaıań shaqtarda aýyzbirshilikti, adaldyqty, yntymaqty tý etip kótergenin aıtady.
«Adam taǵdyry ulys taǵdyrymen tyǵyz baılanysty ekenin qapysyz tanyǵan, kóptiń máselesin qara bastyń qamynan joǵary qoıǵan aǵa býynnan úlgi alyp óstik. Bul baspananyń qurylys jumystaryn túgeldeı ózimiz júrgizdik. Aqyldasa kele jańa úıdi kópbalaly otbasyna syılaýdy jón sanadyq. Baspanaly bolyp, tóbesi kókke eki eli jetpeı turǵan otbasy músheleriniń júzindegi qýanyshty kórip, marqaıyp qaldyq. Kópshilikpen jınalǵan qarajatqa úıdi zaman talabyna saı etip turǵyzdyq. Atsalysqan barlyq azamatqa Alla razy bolsyn. Bul – osy kúnge deıingi muqtaj otbasylaryna arnap salynǵan 18-úı», dedi Beksultan Ábishov.
Osyndaı qaıyrymdylyq isterdiń basy-qasynda júrgen áriptesimiz Nurtas Muhtarulynyń aıtýynsha, Bekzat Sattarhanov atyndaǵy shaǵyn aýdanynyń 1982 jyly týǵan azamattary 20 jyldyq túlekter kezdesý keshinde muqtaj otbasyna baspana syılap, jastarǵa osylaısha úlgi kórsetken. Buǵan qosa 1988 jyly týǵan azamattar da Áz-Naýryz merekesi qarsańynda bir otbasynyń baspanaly bolýyna sebepshi bolypty. Byltyr 1993 jylǵylar Aqmeshit ımamyna 4 bólmeli úı tabystady. Endi kelesi jyly 1995 jylǵy azamattar ıgi isti jalǵastyrmaq. Al aldaǵy mamyrda 1987 jylǵylar taǵy bir baspanany muqtaj otbasyna tabys etedi.
Tek oblys ortalyǵynda emes, barlyq aýdanda da jastar qaıyrymdylyq isterimen el alǵysyna bólenip júr. Mysaly, Tólebı aýdany Aqbastaý aýylynyń jastary asarlatyp, 7 balaly jalǵyz basty áıelge úı soǵyp bergen edi. Sozaq aýdany Sholaqqorǵan aýylyndaǵy Y.Altynsarın mektebiniń, Sozaq aýylyndaǵy Naýaıy mektebiniń túlekteri de turmysy tómen, jalǵyzilikti anaǵa úı tabys etken. Arys qalasynyń №32 Á.Jangeldın atyndaǵy jalpy bilim beretin mektebin 2004 jyly bitirgen túlekter de ıgi iske qoldaý tanytyp, muqtaj otbasyny baspanaly etken edi.
Aıta ketelik, óńirde 2018–2024 jyldar aralyǵynda kezekte turǵan azamattarǵa bıýdjet esebinen 16 925 (9 308 – arendalyq, 7 617 – kredıttik) páter paıdalanýǵa berilgen. О́tken jyly 47,8 mlrd teńgege 2 590 arendalyq páter satyp alynǵan. Oblysqa 2025 jyly 578 arendalyq páter satyp alýǵa 7,7 mlrd teńge bólindi.
Túrkistan oblysy
