Bul sharada 200 adam bir mezette arqan tartyp, osynaý ulttyq sporttyń buǵan deıin bolmaǵan nátıjesin kórsetken. «Biz bul is-sharany salaýatty ómir saltyn nasıhattaý, ulttyq muramyzdy ulyqtaý jáne jastardyń sportqa qyzyǵýshylyǵyn arttyrý úshin uıymdastyrdyq» deıdi oblystyq dene shynyqtyrý jáne sport basqarmasy ókilderi.
Bir qyzyǵy, 200 adam qatysatyn tartysqa 300 metrlik arqan kerek bolypty. Mundaı arqannyń eń uzyny 100 metrden aspaıdy eken. Sóıtip, Almaty qalasynan aldyrylǵan úsh bólek arqandy bir birine jalǵaýǵa týra kelipti. «Al komanda jınaýda esh qıyndyq bolmady. Saıysqa tek sportshylar emes, qala turǵyndary, jastar uıymdarynyń belsendileri qatysty» deıdi basqarmanyń baspasóz qyzmetiniń jetekshisi Aınur Qasenova.
Saıysqa túsken komandanyń biri - «Jaıyq», biri - «Edil» degen ataýdy tańdap alypty. Qyzyqty da tartysty ótken básekede «Jaıyq» komandasy jeńiske jetip, kópshiliktiń qoshemetine bólendi.
Qazaqstanda eń kóp adam qatysqan arqan tarysty resmı tirkep alý úshin Oral qalasyna Qazaqstan rekordtar kitabynyń resmı ókili Qýandyq Qudaıbergenov arnaıy shaqyrylǵan bolatyn. Ol ulttyq sport dodasyn bastan aıaq tamashalap, shynymen de rekord ornatylǵanyn jarııalady. Sóıtip, uıymdastyrýshylarǵa arnaıy sertıfıkat saltanatty túrde tabystaldy.
Batys Qazaqstan oblysy
