Shaharda jigitterdi Otan aldyndaǵy áskerı mindetin ótep qaıtýǵa shaqyrý naýqany 1 naýryzdan bastaldy. Osyǵan baılanysty kóktemniń alǵashqy kúninen bastap 18 ben 27 jas aralyǵyndaǵy azamattar turǵylyqty jeri boıynsha jergilikti áskerı basqarý organdarynda medısınalyq komıssııadan, psıhologııalyq testter men jeke áńgimelesýden ótip jatyr. Kóktemgi áskerı shaqyrý barysynda Shymkenttiń myńnan asa azamatyn sarbazdar sapyna qosý kózdelip otyr.
Birinshi kezekte jaýyngerlik mindetine jańa kirisken jigittermen Ulttyq qaýipsizdik komıteti Shekara qyzmetiniń, Memlekettik kúzet qyzmetiniń bólimsheleri tolyqtyrylady. Sodan keıin Qarýly kúshterdiń, Tótenshe jaǵdaılar mınıstrliginiń jáne Ishki ister mınıstrligi Ulttyq ulannyń áskerı bólimderi jasaqtalady. Búginde megapolısten júzden asa azamat Otan aldyndaǵy boryshyn óteý úshin Shekara qyzmetine attanǵan. Olardyń barlyǵy – shaqyrý komıssııasynyń otyrysynan ótip, oń qorytyndy alǵandar, ıaǵnı áskerge jaramdy jandar.
Qorǵanys isteri jónindegi departamentiniń bastyǵy, polkovnık Á.Shegebaev áskerge shaqyrýdy jergilikti atqarýshy organdar uıymdastyratynyn, al shaqyrý komıssııasyn Shymkent qalasy ákiminiń orynbasary basqaratynyn atap ótti.
«Shaqyrý naýqany bekitilgen keste boıynsha ótip jatyr. Jigitterdi áskerge bólý tártibi medısınalyq tekserý nátıjesine, kásibı-psıhologııalyq shamasyna, densaýlyq jaǵdaıy men daıyndyq deńgeıine baılanysty iske asyrylady. Sonymen qatar elimizdiń zańnamasyna sáıkes áskerı qyzmetin ótep kelgen jastar joǵary oqý ornyna qujat tapsyrarda qosymsha artyqshylyqtarǵa, sonyń ishinde bilim berý granttaryna ıe bola alady», dedi departament bastyǵy.
Sonymen qatar brıfıng barysynda polkovnık ótken jyldyń qorytyndysyn jarııalady. Soǵan sáıkes byltyr Shymkentten Qarýly kúshterge jáne basqa da áskerler men áskerı quralymdarǵa 2 myńnan asa adam jiberildi. Departament bastyǵynyń aıtýynsha, byltyrǵy áskerge shaqyrý naýqany júz paıyzdyq mejeden artyq oryndalǵan. О́z kezeginde polkovnık áskerı qyzmetshilerge áleýmettik jeńildikter qarastyrylǵanyn atap ótti. Bul – qyzmet barysynda jáne zapasqa shyqqannan keıin 60 kúnge deıin nesıelik demalys; UBT tapsyrmaı, joǵary oqý oryndaryna túsý múmkindigi; jumysshy mamandyqtary boıynsha memlekettik kýálik alý; zapasqa shyqqannan keıin jumysqa ornalasý múmkindigi.
Á.Shegebaev óz sózinde densaýlyǵy jaramdy elimizdiń árbir azamaty zańǵa sáıkes Otan aldyndaǵy áskerı boryshyn mindetti túrde ótep qaıtýǵa tıis ekenin kópshilik aldynda taǵy bir márte eske saldy.
«Ákimshilik quqyq buzýshylyq týraly Kodeks boıynsha esh sebepsiz áskerı shaqyrý naýqanyna kelmegen jandarǵa tıisti shara qoldanylady, sonyń ishinde medısınalyq kýálandyrýdan jaltarǵandarǵa eskertý nemese aıyppuldar qarastyrylǵan. Tipti qylmystyq jaýapkershilikke tartylýy múmkin. Mundaı jaǵdaıda áskerden qashyp júrgen azamattar qoǵamdyq jumystarǵa tartylady nemese tipti bas bostandyǵynan aıyrylýy da múmkin», dedi ol.
Sondaı-aq brıfıng barysynda sóz alǵan «Qarýly kúshter ardagerleri» RQB Shymkent qalasy boıynsha fılıalynyń tóraǵasy, otstavkadaǵy polkovnık Serikbaı Onbaev qalada jumys isteıtin áskerı-patrıottyq klýbtarǵa orta bilimi bar, arnaıy oqýdan ótken fızıkalyq daıyndyǵy myqty jastar kóbirek jazylyp jatqanyn jáne olardyń sany jyldan-jylǵa kóbeıe bastaǵanyn maqtanyshpen jetkizdi. Máselen, byltyrǵy kóktemgi-kúzgi shaqyrý naýqanynda áskerı-patrıottyq klýbtyń 400-den asa jas múshesi ásker qataryna alyndy.
«Qalamyzdan áskerge attanyp jatqan jastarǵa aıtarym, qazirgi tańda uldarymyzǵa memleket tarapynan kóptegen jaqsy jaǵdaı jasalǵan. Solardyń ishinde sarbaz mektebin kórgender biraz jeńildikpen qamtylady. Atap aıtqanda, tamaqtaný, kıim-keshek, jeke bas gıgıenasy quraldary, aı saıynǵy aqshalaı tólem, medısınalyq qyzmet, poshtalyq jóneltýler járdemaqysy. Sonymen qatar orta-tehnıkalyq nemese joǵary bilimi bar áskerı qyzmetshiler 6 aı mindetin ótkergennen keıin kelisimshart boıynsha áskerı qyzmetke aralasýǵa quqyly», dedi S.Ońbaev.
Shymkentte kóktemgi áskerı shaqyrý naýqany 30 maýsymǵa deıin jalǵasady, barlyq is-shara elimizdiń zańnamasyna sáıkes qatań túrde júrgiziledi. Shaqyrý qaǵazdary áskerge shaqyrylýshylarǵa turǵylyqty nemese jumys orny boıynsha, sondaı-aq 1414 servısinen SMS-habarlamalar arqyly jetkiziledi. Áskerı qyzmetti keıinge qaldyrýdy nemese odan bosatýdy jergilikti atqarýshy organdar arqyly ne elektrondyq úkimet portalynda resimdeýge bolady.
Keıinge qaldyrý úderisi búginde tolyǵymen avtomattandyrylǵan. Buryn qaǵaz anyqtamalardy usyný talap etilse, endi stýdentter týraly málimetter Qorǵanys mınıstrliginiń aqparattyq júıesine tikeleı Oqý-aǵartý mınıstrligi men Ǵylym jáne joǵary bilim mınıstrliginiń bazalary arqyly taratylady. Al shetelde oqıtyn azamattar elektrondyq úkimet portalynyń kómegine súıenip stýdent retinde onlaın tirkele alady.
ShYMKENT
