Foto: Úkimettiń baspasóz qyzmeti
Jospardy iske asyrý nátıjesinde uzyndyǵy 150 shaqyrym bolatyn álemdik deńgeıdegi taý shańǵysy kýrortyn salý josparlanǵan. Jańa kýrort jylyna 5 mln-ǵa deıin týrısterdi tarta alady dep kútiledi.
Keshendi jospardyń taǵy bir jobasy «Mańǵystaý» týrıstik aımaǵyn damytýǵa baǵyttalǵan. Ol boıynsha Tuzbaıyr, Qyzylqup, Torysh, Aıraqty sııaqty biregeı oryndarǵa qol jetkizýge bolady jáne jańa nysandardyń ashylýyna jaǵdaı jasalǵan.
Sonymen qatar ekotýrızmdi ilgeriletý maqsatynda Ulttyq saıabaqtardy damytý boıynsha jumystar júrgizilip jatyr. Sońǵy jyldary bazalyq ınfraqurylymy bar 8 týrıstik vızıt-ortalyq salynǵan.
«Biz elimizdiń ulttyq parkterine kelgen ekotýrısterdiń turaqty ósýin baıqap otyrmyz. 2024 jyldyń qorytyndysy boıynsha 14 ulttyq parkke 2,8 mln adam baryp, kelýshilerdiń sany 2023 jylmen salystyrǵanda 18%-ǵa ósti. Artyp kele jatqan suranysty qanaǵattandyrý úshin árbir ulttyq parkti negizgi týrıstik ınfraqurylymmen qamtamasyz etý jáne jańa sapar-ortalyqtaryn salý josparlanyp otyr. Sonymen qatar barlyq ulttyq parkterde Býrabaıdaǵy sekildi kirý júıesin sıfrlandyrý qajet», dedi týrızm jáne sport mınıstri Erbol Myrzabosynov.
Osyndaı jumys týrızmniń ártúrli túrlerin damytý basqa óńirlerde de júzege asyrylady. Ásirese, týrızmniń etno-mádenı, balalar men jasóspirimder, medısınalyq, saýyqtyrý, iskerlik, karavanıng jáne avtotýrızm sekildi túri basymdyqqa ıe.
