Qazaqstan halqy Assambleıasynyń 30 jyldyǵyna oraı ótkizilgen qazaqtyń ulttyq oıyny kókpardyń jalpy júlde qory – 4,5 mln teńge. Túrkistan oblystyq qoǵamdyq damý basqarmasy «Qoǵamdyq kelisim» KMM-niń qoldaýymen uıymdastyrylǵan is-sharaǵa elimizdiń birqatar óńiri men Germanııa, Reseı, Qytaıdan kelgen qonaqtar, sondaı-aq oblystyń barlyq aýdan, qalalarynan atbegiler men shabandozdar, ardager sportshylar, jergilikti turǵyndar qatysty. Kókparda as berilip, kıiz úıler tigilip, patrıottyq ánder shyrqaldy.
Shardara aýdanynyń týmasy, ulttyq sporttyń janashyry, jeke kásipker Vıktor Derevıanko elimizdiń tutastyǵy men birligin, tatýlyǵy men tynyshtyǵyn nyǵaıtý árbir azamattyń mindeti ekenin atap ótti. «Bıyl qoǵamdaǵy dostyq pen birlikti nyǵaıtýǵa ólsheýsiz úles qosyp otyrǵan Qazaqstan halqy Assambleıasynyń 30 jyldyǵy keń kólemde atalyp ótilip jatyr. Mereıli jylǵa oraı osy eldiń azamaty retinde óz úlesimdi qosaıyn degen nıetpen kókpar ótkizýdi maqsat ettim. Kókpar – qazaqtyń tól sporty ári rýhy myqty jigitterdiń oıyny. Pyraqtyń ústinde ósken azamat elshil, halyqshyl keledi dep oılaımyn. Sondyqtan da, bul ulttyq sportty nasıhattaýdy aldaǵy ýaqytta da jalǵastyrmaq nıettemin», dedi Vıktor Derevıanko.
Sport saıysynyń qorytyndysynda úzdik shabandozdar qarjylaı syılyqtarmen marapattaldy. Bul oraıda, kelestik Ǵalymjan Myrzabaev pen qazyǵurttyq Báıdibek Sabyrov úzdik atanyp, olarǵa 500 myń teńge syıaqy tabystaldy. Basqa da shabandozdarǵa qomaqty syılyqtar berildi. Dúbirli doda sońynda qarııalar jastarǵa bata berip, elimizdiń yrys-nesibesi molaıyp, halqymyzdyń bereke-birligi arta bersin degen izgi tilekterin jetkizdi.
Túrkistan oblysy
