Semeı qalasynda ótken tazalyq sharalaryna oblys ákimi Berik Ýálı qatysty. Aımaq basshysy 4 sáýirde oblys turǵyndaryna arnaıy úndeý joldap, jalpyóńirlik tazalyq aksııasy bastalǵanyn jarııa etti. О́ńirdiń barlyq qala, aýdandarynda, eldi mekenderinde jappaı senbilik uıymdastyryldy. Turǵyndar aýmaqtardy kúl-qoqystan tazartyp, kóshe, alań, aýlalardy retke keltirdi.
Semeıdegi senbilikke 20 myńnan astam adam qatysyp, 1000 tekshe metrden astam qoqys polıgonǵa shyǵaryldy. Maqanshy aýdanynda da aýqymdy senbilik uıymdastyryldy. Oǵan 3 myń adam qatysyp, 2 myńǵa jýyq aǵash kósheti otyrǵyzyldy. Besqaraǵaı aýdanyndaǵy tazalyq sharasyna 300-ge jýyq turǵyn qatysyp, aýyl kósheleri tazartyldy, 1 myńǵa jýyq kóshet otyrǵyzyldy. Kókpekti aýdanyndaǵy tazalyq aksııasyna 1 myńǵa jýyq adam, 30 arnaıy tehnıka tartylyp, 20 tonnadaı qoqys shyǵaryldy. Abaı aýdanynyń Qaraýyl aýylynda 300-den astam mekeme qyzmetkerleriniń qatysýymen jappaı senbilik ótti, 15 tonna qoqys shyǵaryldy. Kýrchatovtaǵy jalpyqalalyq senbilikte turǵyndar jaıaý júrginshiler joldaryn sypyryp, kógaldardy tazartty. 1 000 qaptan astam qoqys syrtqa shyǵaryldy. Aıagóz qalasynyń turǵyndary da belsendilik tanytty. Senbilikke 3 myńnan astam adam qatysyp, qalanyń ortalyq kósheleri, saıabaqtary, aýlalary men qoǵamdyq oryndaryn kúl-qoqystan tazartty.
Tazalyq aksııasy jyl boıy jalǵasady. Ákimniń úndeýinde aıtylǵandaı, aksııa barysynda arnaıy baıqaý jarııalanyp, «úzdik aýdan», «úzdik aýyl», «úzdik aýla», «úzdik ýnıversıtet», «úzdik kolledj», «úzdik mektep», «úzdik balabaqsha», «úzdik kóshe», «úzdik mekeme», taǵy basqa atalymdar boıynsha tazalyq janashyrlary anyqtalady. Jyl sońynda jeńimpazdarǵa qomaqty syılyqtar tabystalady.
Abaı oblysy
