Soltústik búıiri Reseımen, shyǵysy oblys ortalyǵy О́skemenmen shektesip jatqan Altaı aýdanynyń asty kenge, ústi dánge baı. О́nerkásiptik, ári aýylsharýashylyq aımaq. Kúni keshe ǵana jumysyn bastap jatqan jańa zaýyt jer emgen dıqandardyń qolyn edáýir uzartpaq. Altaı aýdany sharýalarynyń deni egin sharýashylyǵymen aınalysatyndyqtan, jańbyrlatyp sýarý apparaty ónimniń artýyna da yqpalyn tıgizedi. Onyń ústine zaýyt jylyna 1 000 dana mashına jasaýǵa qaýqarly eken. 1 000 mashına myńdaǵan gektar jerdi áp-sátte sýaryp shyǵady. Ár sharýa dán ekken jerine mundaı qurylǵy ornatsa, qurǵaqshylyq kún raıy da ónimniń kólemine kesirin tıgizbeıdi. Iá, onyń jumysyn alǵashqy qurylǵy ornatylyp, egistikke shyǵarylǵan soń jeke qaýzaımyz.
«Á» dep bastalǵan zaýytta qazir 22 adam jumys istep júr. Jumys jospardaǵydaı júrip jatsa, 114 adamdy jumyspen qamtıdy.
– Prezıdent 2030 jylǵa deıin 3 mln gektar jer sýarmaly bolýǵa tıis degen. Mine, biz osy baǵytta jumys bastadyq. Tolyqtaı otandyq tehnologııany paıdalanyp otyrmyz. Tek qana temirlerdi syrttan kirgizemiz. Búginde jumys qarqyndy júrip jatyr, – deıdi «Ertis Bereke Oskemen» JShS quryltaıshysy Ánýar Qasymov.
Zaýyttyń bir ereksheligi – tolyqtaı avtomattandyrylǵan. Temirden jasalatyn tetiktiń ózi jabyq qurylǵynyń ishinde aldyn ala jasalǵan kompıýterlik baǵdarlama arqyly jonylady eken. Tipti shaǵyn tetikterine deıin osynda jasalady. Ol úshin ákki sheberliktiń qajeti joq sekildi kórindi. Mamandar túımeni basyp, kerekti temirdi ornyqtyryp qoısa bolǵany. Jo-joq, ekranǵa baǵdarlamany engizý kerek. Sonymen sharýa bolady. Jasalǵan ónimdi sórelerge jınastyryp, qurastyra beredi. Jumys endi bastalyp jatqandyqtan Astanadan kelgen arnaıy mamandar da qyzmet etip júr. Zaýyttyń aýy men baýy yńǵaılanyp, dóńgelenip ketken soń keri qaıtamyz desedi olar.
Sýretti túsirgen – avtor
– Zaýytqa ornatqan qurylǵylardyń barlyǵy jap-jańa. Mashınalardy zamanaýı tehnologııalarmen qurastyryp jatyrmyz. Suranysqa qaraı jańbyrlatyp sýarý mashınalaryn jasaı bermekpiz. Aıta keteıik, mundaı zaýyt Qazaqstanda ekeý-aq. Serebrıanka qalasyndaǵy óndiris oshaǵy, mine jumysyn bastady. Sáýirde alǵashqy mashınamyz daıyn bolady, – deıdi jobalaýshy ınjener Abylaıhan Tóleýov.
«Su Bereke» markaly jańbyrlatyp sýarý qurylǵylarynyń sapasy da aldaǵy maýsymda belgili bolady. Degenmen qurastyrýshylar suranystyń joǵary bolaryna senimdi. Sebebi buǵan deıin mundaı mashınalarǵa sharýalar tek oń pikir bildirgen. Byltyr Ulan aýdanynda bul qurylǵylar ornatylyp, ónimniń mol túsýine septesken. Suranys bolsa, jobalaýshy mamandar mashınany shetelge de shyǵarýǵa múmkindik baryn aıtty. Biraq áýelgi maqsat – eń aldymen Shyǵys Qazaqstannyń egistik alqaptaryn qamtyp alý.
Jasalyp jatqan mashınalar egistik alqaptarǵa jetkizilgen soń, zaýytqa qaıta at basyn buramyz. Sharýalardyń pikirin tyńdap, jańbyrlatyp sýarýdyń tıimdiligin kóremiz. Ázirshe zaýyt jumysy qarqyn alýyn tiledik.
Shyǵys Qazaqstan oblysy,
Altaı aýdany
