Bul – túrki halyqtarynyń arasynda qaz ósirýdiń ejelgi ádisteri men tásilderin nasıhattaýǵa baǵyttalǵan is-shara. Sonymen qatar osynaý is-sharaǵa «Birinshi halyqaralyq túrki etnomádenı festıvali» degen qosalqy ataý da berilgen. Sondyqtan festıvalǵa túrkitildes elder Majarstannyń «Gallicoop», Bashqurtstannyń «Bashkırskaıa ptısa», Marı El Respýblıkasynan «Lotfýllın» kompanııalarynyń, sondaı-aq Tatarstan men Chývashııanyń qus ósirý salasynyń ókilderi qatysty.
Qyzyljardaǵy qazǵa arnalǵan festıval shahardyń eń úlken saraıy N.Pogodın atyndaǵy orys drama teatrynda ashyldy. Onyń resmı saltanatyna Majarstannyń bas konsýly Soke Sabolch, Tatarstannyń tatar kásipkerlerine kómek jónindegi Dúnıejúzilik qaýymdastyǵynyń atqarýshy dırektory Farıd Ýrazaev jáne Bashqurtstan, Chývashııa jáne Marı El Respýblıkasynan qus ósirý salasynyń basshylary, óz elimizden Batys Qazaqstan, Aqmola, Qaraǵandy, Qostanaı, Soltústik Qazaqstan oblystarynyń aýyl sharýashylyǵy mamandary qatysty.
Jıyndy Soltústik Qazaqstan oblysynyń ákimi Ǵaýez Nurmuhambetov ashyp, júrgizip otyrdy. «Aýyl» partııasynyń tóraǵasy Serik Egizbaev atalǵan is-sharanyń mańyzyna toqtala kele, qamtylǵan máseleler salanyń damýyna tyń serpin bererine senim bildirdi.
«Bul biregeı bastama yntymaqtastyqty damytý, birlikti nyǵaıtý jáne Qazaqstan halqynyń ekonomıkalyq murasyn saqtaý, aýyl turǵyndary arasynda qaz ósirýge qyzyǵýshylyq arttyrý, agroónerkásiptik keshenge ınvestısııa tartýdy kózdegen ıgi is-shara bolaryna senimdimiz», dedi ol.
Soltústik Qazaqstan oblystyq aýyl sharýashylyǵy basqarmasynyń basshysy Dáýren Toqýshynov óńirdegi qus sharýashylyǵyn damytýdyń keleshegi men máseleleri týraly aıtty. Sonymen qatar ol osy sala boıynsha sheteldiktermen yntymaqtasýǵa ázirligin bildirdi.
Forým barysynda qaz sharýashylyǵy boıynsha Majarstan memleketimen yntymaqtasýdy nyǵaıtý, salany damytýdyń praktıkalyq negizderi, quramajem jáne ol úshin konsentrattar óndirý, mamyq óńdeý, soıý men ótkizý, Batys Qazaqstan oblysynda qaz ósirý tájirıbesi men Almaty oblysynda qaz sharýashylyǵyn damytý barysy sııaqty máseleler talqylandy.
Buǵan qosa osydan biraz jyl buryn qanatqaqty joba retinde Aqmola oblysynda birneshe otbasyna 160 qaz balapanynan baǵý úshin tegin berilgenin, olardyń jemi men veterınarlyq baqylaýdy ózderi júrgizgenin, al arada 4-5 aı ótkende baǵýshylar fermerlerge onyń sanynyń tek 25 paıyzyn ǵana qaıtaryp, shyǵynyn ótegenin, al qalǵanyn ózderi qalaýynsha satyp, 1,5 mln teńgedeı tabys tapqany aıtyldy. Qazir sol otbasylarynyń keıbiri 1,5 myńdaı balapan asyrap, satýǵa qol jetkizip otyr eken. Mine, osyndaı ozyq tájirıbelerdi taratý jaǵy nasıhattaldy.
Festıval barysynda qaz etinen jasalǵan taǵamdar usynyldy. Reseı jerinen kelgen tatar, bashqurt jáne t.b halyqtardyń aspazdary daıyndaǵan bul dámder til úıirdi. Olar qyzyǵýshylarǵa taǵamdy daıyndaý resepterimen de bólisti. Al teatr aldyndaǵy alańda fermerlik jáne kádesyı taýarlarynyń jármeńkesi qyzyp jatty. Osy jerde er-toqym túrleri, at ábzelderi sórelerde samsap turdy. Festıval qalanyń bas alańynda da jalǵasyp, munda asyq atý, armrestlıng, gir kóterý, qazdar jarysy jáne t.b sport jarystary men etnofolklorlyq ansamblder konserti ótti. Buryn-sońdy Qyzyljarda bolmaǵan qaz jarysynyń da ózindik qyzyǵy kóp bolyp, kórermenderdi máz qyldy. 20 qaz qatysqan qorshaýly joldyń boıynda kórermender qazdardy telefondarymen túsirip álek. Osylaısha, Soltústik Qazaqstan kókteminiń alǵashqy kúnderinde eldi eleń etkizgen, halyqty shattyqqa bólegen erekshe dýman saltanat qurdy.
Soltústik Qazaqstan oblysy
