Eki kezdesýde de jeńiske jetken jerlesterimiz jarystyń negizgi bóliginde kúsh synasýǵa múmkindik beretin jalǵyz joldamany ıelendi.
Qazaqstannyń tennısshileri álem chempıonatyna balanǵan jarysqa joldama alý úshin alǵashqy aınalymda Aýstralııadan 2:1 esebimen aılasyn asyrǵany jaıynda biz buǵan deıin jazǵanbyz. Kelesi kúni Kolýmbııamen kúsh synastyq. Ońtústik Amerıka qurlyǵynan kelgen oıynshylar jerlesterimizge jarytyp qarsylyq kórsete almady. Atap aıtsaq, Iýlııa Pýtınseva Valentına Arıasty 6:0, 6:1 esebimen oısyrata utty. Jarqyn jeńiske jetý úshin Iýlııaǵa nebary 38 mınýt jetkilikti boldy. Elena Rybakınaǵa da óz qarsylasyn eńserý aıtarlyqtaı qıyndyq týǵyzǵan joq. Ol Iýlıana Lızarazonyń «máselesin» bar-joǵy 52 mınýtta sheshti – 6:1, 6:2.. Sóıtip, bizdiń burymdylar endi 16-21 qyrkúıek aralyǵynda Qytaıdyń Shenchjen qalasynda jalaýy jelbireıtin jarystyń fınaldyq bóliginde kúsh synasady.
Esterińizge sala keteıik, Bıllı Djın Kıng kýbogi 1963 jyldan beri uıymdastyrylyp keledi. 2020 jylǵa deıin ol Federasııa kýbogi dep ataldy. Osy týrnırde eń mol oljaǵa AQSh quramasy keneldi. Amerıkalyqtar 18 jarysta aldyna jan salmady. Chehııanyń 11 márte mereıi ústem bolsa, Aýstralııanyń alty alamanda asyǵy alshysynan tústi. Jekelegen tennısshiler arasynan Krıs Evertke teń keler eshkim joq. HH ǵasyrdyń 70-80 jyldary jasyndaı jarqyldaǵan AQSh-tyń Florıda shtatynyń týmasy 8 týrnırde top jardy. Al Bıllı Djın Kıngtiń ózi jeti ret jeńis toıyn toılady.
Osyǵan deıin Qazaqstan quramasy atalǵan jarystyń fınaldyq bólginde 2022 jáne 2023 jyldary óner kórsetti. Biraq qadamymyz sátti bolmady. Bálkim, osy joly jerlesterimiz barynsha nátıjeli oıyn órnegin kórsetip, óz jankúıerlerin qýantady degen oıdamyz.
