WorldSkills Almaty-2025 chempıonatynyń júlde qory shamamen 10 mıllıon teńgeni quraıdy. 30 negizgi quzyrettilik boıynsha I orynǵa – 150 000 teńge, II orynǵa – 100 000 teńge, III orynǵa 50 000 teńge aqshalaı syılyq beriledi. Top jarǵan úzdik komanda kelesi jyly Shanhaıda ótetin halyqaralyq chempıonatta Qazaqstannyń namysyn qorǵaıtyn bolady.
Búginde Almatydaǵy 88 kolledjde 85 myńnan astam stýdent oqyp jatyr. 22 memlekettik kolledjde jumysshy mamandardy daıarlaý tolyǵymen qala ákimdigi esebinen qarjylandyrylady.
Chempıonatqa 200-den astam kolledj stýdentteri qatysýda. Chempıonat tehnıkalyq jáne kásiptik bilimniń bedelin arttyrýǵa, sondaı-aq jastar arasynda jumysshy mamandyqtardy nasıhattaýǵa baǵyttalǵan.
Almaty ákimi Erbolat Dosaev qatysýshylarmen kezdesip, jumystarymen tanysty. Stýdent jastar arasynda jumysshy mamandyqtardyń damýyn qoldaıtynyn jáne keıbir mamandyq boıynsha grant bólý múmkindigin qarastyrylyp jatqanyn atap ótti.
Saıys ınjenerııa jáne IT-den bastap qyzmet kórsetý, dızaın, qurylys jáne avtokólikti dıagnostıkaǵa deıingi kóptegen quzyretti qamtıdy.
Jarysqa qatysqan Almaty qurylys-tehnıkalyq kolledjiniń stýdenti Dmıtrıı Klımov «Santehnıka jáne jylytý» quzyretinde bilimi men daǵdysyn kórsetti. «Bizge tapsyrma berildi, men radıator ornatyp, peshti qostym, rakovına, ýnıtaz jáne káriz júıesin ornattym. Bulardyń bárin bizge kolledjde úıretedi. Santehnıka baǵytyn sanaly túrde tańdadym, sebebi bul suranysqa ıe ári bolashaǵy bar sala dep sanaımyn. О́z bilimimdi úıde de qoldanamyn. Birde úıde ýnıtaz buzylyp qaldy, ony ózim jóndedim. Anam sheber shaqyrtýdyń qajeti bolmaǵanyna qýandy», - deıdi ol.
Oqýyn telekommýnıkasııa salasymen ushtastyryp, bolashaqta provaıderlik kompanııa ashýdy armandap júrgen Bota Erdenbaer bul salaǵa erte kezden qyzyqqanyn astady. Onyń aıtýynsha, salada mamandar tapshy, al bilikti kadrlarǵa suranys óte joǵary. «Kóp adam osy mamandyqqa qyzyǵýshylyq tanytsa deımin. Men eńbek naryǵyndaǵy baǵamdy qazirdiń ózinde sezinip otyrmyn – bul áli bastamasy ǵana. Kolledjde oqyp júrip, bos ýaqytymda júıe ákimshisi bolyp jumys istep, aqsha tabamyn. Bolashaqta IT-kompanııamdy ashqym keledi» dep oıymen bólisti ol.
Baıqaý jumystaryn 500-den astam sarapshy men jumys berýshi baǵalaıdy. Sarapshy, tehnıkalyq ǵylymdar magıstri ári oqytýshy Tańsholpan Tólendıevanyń aıtýynsha, stýdentterge úsh jyl boıy mehanıkanyń negizderimen qatar zamanaýı tehnologııalyq baza úıretilgen. Olar porshen saqınalaryn aýystyryp, qozǵaltqyshty bólshektep-jınaýmen, berilis qorabymen jumys isteýmen aınalysady, sondaı-aq, shyn avtokólikke dıagnostıka júrgizip, aqaýlardy joıa alady. Bolashaq mamandar santehnıkalyq jabdyqtardy ornatady, kabeldik jelilerdi tartady, elektronıka jobalaý jáne jınaý, mobıldi qosymshalar men grafıkalyq dızaın jasaıdy, 3D-prınterde buıymdar shyǵarady.
Chempıonatta shyǵarmashylyq baǵytqa da erekshe kóńil bólingen. Qatysýshylar kıim úlgilerin ázirlep, vıtrınalardy bezendirip, aspazdyq taǵamdar daıyndap, kúrdeli shashtaraz tehnıkasyn oryndaıdy. Telekommýnıkasııa jáne avtokólikterdi tehnıkalyq qyzmet kórsetý salasynda da kásibı sheberligin kórsetedi.
ALMATY
