Halyqaralyq ǵarysh stansasyna kezekti, 73-uzaqmerzimdi ekspedısııamen ushyrylym jasaǵan kemeniń bortynda tájirıbeli komandır, bortınjener jáne ekspedısııa komandıri, «Roskosmos» ǵaryshkeri Sergeı Ryjıkov, kemeniń birinshi bortınjeneri, ekspedısııa bortınjeneri, «Roskosmos» ǵaryshkeri Alekseı Zýbrıskıı jáne kemeniń ekinshi bortınjeneri, NASA ǵaryshkeri Djonatan Kım bar. Ushyrý úderisi shtattyq rejimde ótti.
Baıqońyrǵa jumys saparymen barǵan Parlament depýtattary «elimizden tórtinshi ǵaryshkerdi ushyrý qajet» degen usynys aıtyp, bul maqsatqa arnaıy joba ázirleý kerektigin de usyndy. Sapar barysynda depýtattar kún tártibindegi negizgi úsh máseleni qarady. Alǵashqysy — «Báıterek» ǵarysh keshenindegi kadr máselesi. Qazir keshende 150-den asa maman jumys isteıdi, olardyń 80 paıyzy — Qazaqstan azamattary. Alaıda aldaǵy ýaqytta jumys kúshin 500 adamǵa deıin arttyrý josparlanyp otyr. Mamandardyń aıtýynsha, kadr tapshylyǵyna eń aldymen jalaqynyń tómendigi sebep.
Aıta keteıik, bıyl Baıqońyrdan elimiz alǵashqy zymyranyn ushyrady. Bul qadam «Báıterek» jobasy aıasynda júzege asyrylmaq. Qazirgi tańda ǵaryshtyq zymyran kesheni qyzý daıyndyq ústinde. Kún tártibindegi ekinshi másele — tehnıkalyq bazany qalyptastyrýǵa qatysty boldy. Jıyn barysynda elimizden taǵy bir ǵaryshker daıarlaý jaıy da kóterildi. Bul baǵytta kóp daıyndyq pen ýaqyt qajet ekeni aıtyldy. Depýtattar aldaǵy onjyldyqta tórtinshi qazaq ǵaryshkerin ǵaryshqa attandyrýdy josparlap otyr. Osy kúni ǵaryshkerlerdi ushyrý isimen Reseı, AQSh jáne Qytaı aınalysyp keledi. Bul tusta depýtattar elimizdiń Reseımen birlesip jumys isteýi qajettigin alǵa tartty. Al kún tártibindegi barlyq másele úkimetke jetkizilmek.
Budan bólek, «Soıýz MS-27» ǵarysh kemesi basqarylatyn ushyrylym qarsańynda «Baıqońyr» ǵarysh aılaǵynda «Roskosmos» basshysy Dmıtrıı Bakanov pen Sıfrlyq damý, ınnovasııalar jáne aeroǵarysh ónerkásibi mınıstrligi Aeroǵarysh komıtetiniń tóraǵasy Baýbek Oralmaǵambetovtiń kezdesýi ótti. Taraptar «Baıqońyr» ǵarysh kesheniniń aldaǵy 70 jyldyq mereıtoıyn, ǵarysh aılaǵynyń týrıstik áleýetiniń múmkindigin talqylap, Baıqońyrdyń qurylǵan kúnin birlese atap ótýge kelisti. Sonymen qatar zymyran ushyrý jáne ǵarysh keshenin jańǵyrtý baǵytyndaǵy «Báıterek» birlesken jobasyn júzege asyrý máselesine erekshe nazar aýdaryldy.
Týrızm jáne sport vıse-mınıstri Erjan Erkinbaevtyń aıtýynsha, árbir zymyran ushyrylymyna 2 myńnan astam týrıst keledi.
«Zymyran ushyrylymyna keletin barlyq týrıst arnaıy qaýipsizdik rásimderinen ótedi, jalpy jylyna on shaqty ushyrylym bolady. Baıqońyr ǵarysh aılaǵyndaǵy túıtkildi máseleniń biri – jatyn oryndardyń jetkiliksizdigi. Sondyqtan zymyran ushyrylymy kezinde barlyq qonaqúı lyq tolady. Tipti qonaqúılerdiń kóbin zymyrandy ushyrýǵa qatysatyn tehnıkalyq qyzmetkerler ıelenedi», dedi Erjan Erkinbaev Úkimet otyrysynan keıin ótken baspasóz máslıhatynda.
