Sýret: instagram.com/asylmurakz/
Qońyr Bekaıdar Almaty sýretshiler ýchılıshesinde oqyp, Almaty sývenır syılyq buıymdar jasaıtyn fabrıkada sýretshi bolyp jumys istegen. Keıin Temirbek Júrgenov atyndaǵy óner akademııasynda oqyp, fabrıkanyń bas sýretshisi qyzmetin atqarǵan. Qońyr aǵa salaly saýsaqtarymen tek sýret qana salyp qoımaı, ult jadynda jandanǵan ejelgi asyl buıymdardy jasaýǵa da yqylas tanytady.
Odaq ydyrap, zaýyt-fabrıka toqtap, jurt jumyssyz qalǵan 90 jyldary Qońyr Egenuly qyzyǵýshylyǵyn kásipke aınaldyryp, asyl jary Anarkúl Narbotanova ekeýi otbasylyq bıznesti bastady. Anarkúl de ónerden qarajaıaý emes. On saýsaǵy myń san oıý jasaýǵa jaralǵan tiginshi. Ol 1-maı birlestiginde tutas tigin sehynyń bastyǵy qyzmetine deıin kóterilgen edi. Birlestik jumysyn toqtatqanda jarynyń qasynan tabylyp, eki sheber ulttyq tigin óneri men zergerlikti úılestirip, zamana suranysyna saı is júrgizdi. Osy kásippen otbasyn asyrap, balalaryn ósirdi.
«Taýsamaly aýylynan jer alyp, úı saldyq. Úsh ul, bir qyz tárbıelep, ónerge baýlydyq. Balalardyń bári Almaty sýretshiler kolledjin bitirip, keıin joǵary bilim de aldy. Qazir Aıdostyń Qaskeleńde músin jasaıtyn jeke óndirisi bar. Baqytjan keramıka, teri buıymdary, at ábzeli sekildi qolónerin jasaýmen aınalysady. Ǵalymjannyń jeke óner mektebi bar. Zergerlik, keramıka, sýret salý mamandyǵymen shuǵyldanady. Ǵalymjannyń jubaıy Bınazıra sazdan qumyra, sazsyrnaı jasap shyǵarady. Erkejan toqyma, batık, gobelen jáne moda kolleksııasyn kórsetedi», deıdi Qońyr aǵa.
Elimiz ben shetelderde ótken kórmelerdiń bas júldesin ıelenip júrgen sheber Sýretshiler jáne Eýrazııalyq dızaınerler odaǵynyń múshesi. 2022 jyly «Qazaqstanǵa eńbek sińirgen qyzmetker» ordenimen marapattalǵan. 2017 jyly ótken «EXPO-2017» kórmesine qatysty. Belgili qolóner sheberi Dárkenbaı Shoqparulynyń 75 jyldyǵyna oraı jasalǵan kórme baıqaýynda 1-oryn ıelendi. «Born Nomad Power Awards 2022» jobasyna qatysyp, onda da úzdik atandy. Almaty oblysy boıynsha ótkizilgen «Mereıli Otbasy» baıqaýynda da alǵa ozdy.
Jan jary Anarkúl zamanǵa saı etnostılde kıim tigip shyǵarady. Sán kolleksııasyn kórsetedi. Memleket jáne qoǵam qaıratkeri, etnograf О́zbekáli Jánibekovtiń 90 jyldyǵyna arnap Túrkistanda ótkizilgen «Taıqazan» respýblıkalyq ulttyq kıimder baıqaýyna qatysyp, «Túrkistan – 2021» gran-prıin utyp alǵan. Basqa da qanshama baıqaýda topjardy. «Maqsatym – qolónerdi, onyń ishinde ulttyq etno kıimderdi qazirgi zamanǵa saı jetildirip, álemge tanytý», deıdi sheber Anarkúl.
