Qaıta jandanǵan kásiporyn

Oblys ortalyǵynan 40 shaqyrym jerde oryn tepken Qyzyljar aýylynyń ajary keıingi jyldary semip bara jatqandaı edi. Mundaǵy jalǵyz qus fabrıkasy 2022 jyly jabylyp, júzdegen adam jumyssyz qaldy. О́ńirdegi qus etiniń óndirisi aıtarlyqtaı kemidi. Saldarynan qańyrap qalǵan qus qoralary men óndiristik tehnologııanyń talan-tarajǵa túsý qaýpi týyndaǵan.

Abyroı bolǵanda, bıyl kóktemde «Qyzyljar-Qus» fabrıkasynyń tamyryna qaıta qan júgirdi. Kásiporyn ınvestory aýysqan soń biraz ýaqyt toqtap turǵan óndiristik úderis iske qosylyp, alǵashqy ónimderin shyǵara bastady. Jaqyn ýaqytta jergilikti dúken sórelerine pavlodarlyq qus etteri jetkizilmek.

Kásiporyndy byltyr qalpy­na kel­­tire bas­ta­dy. Investı­sııanyń 1,5 mlrd teńgesi nysan­dardy qal­py­na keltirýge, qal­ǵan qara­jat qaryz­dardy óteýge, jabdyq­tar satyp alýǵa jáne aınalym qara­ja­tyn tolyq­tyrýǵa jumsalady.

Sáýir­diń basynda óndiriste al­ǵashqy qus soıý jumystary júr­gi­zildi. Nátı­jesinde, munda Qyzyl­jar eldi mekenine jaqyn mańdaǵy aýyldardan 145 adam jumysqa aralasty. Tolyq qýatqa kóshkende kásiporyndaǵy jumysshy sany 250-ge jetedi. О́ndiris kólemin jylyna 10 myń tonnaǵa deıin ulǵaıtý josparlanǵan.

«Qyzyljar-Qus KZ» JShS bas­shysy Aıdar Nyǵmetov qus eti bıznesimen alǵash ret shuǵyl­danyp otyr. Kásiptiń qıyn­dyǵyna qaramastan, jaqyn ýa­qytta óndi­risi órkendeıtinine senimdi, sebebi suranys bar. Jobaǵa qajet qo­sym­sha 3,5 mlrd teńgeni memleket­ten qaryzǵa alady. Munda qazir 4 qus qorasy iske qosylyp, árqaı­sy­syn­da 50 myń taýyqtan ósirilip jatyr. Fabrıkadaǵy qustar Qaraǵan­dydan jetkizilgen. Jaqyn arada taǵy da 5 qus qorasyn ómirsheń etý josparda bar.

«Bizde óndiriletin qus eti eko­lo­gııalyq jaǵynan taza, eshqan­daı dári ekpeımiz, adam den­saý­­lyǵyna zııan keltiretin azyq bermeımiz. Únemi joǵary standarttarǵa ja­ýap beretin ónim berip turamyz degen senimdemiz. Eń áýeli Pavlodar men Ekibastuz turǵyndaryn sapaly ónimmen qamtamasyz etýdi maqsat tutyp otyrmyz. Odan ári Astana nary­ǵyna shyǵaratyn oıymyz bar. Ortamerzimdi maqsatymyz – eksportqa shyǵarý. Jergilikti bılik bizge barynsha kómektesip otyr», deıdi kásipker.

О́ńir basshysy Asaıyn Baı­hanov kásiporyndy aralap kórip, jasal­ǵan jumystarǵa rıza­shy­lyǵyn jetkizgen. Aýylda qańy­rap qal­ǵan fabrıkany qaıta «tirilt­ken» ınvestorǵa alǵysyn aıtypty.

«О́ńirimizge dál osyndaı isker ınvestorlardy kóptep tar­tý qajet. 145 jumys orny qury­lyp úlgerdi. Aqsýdyń aýyldyq aımaǵynda turyp jatqan halyq úshin mundaı áleýetti kásip­oryndar – úlken qol­daý ári turaq­ty tabys kózi. Kezin­de Qyzyljar qus fabrıkasy iri ári qýatty kásiporyndardyń biri bol­ǵanyn umyta qoıǵan joqpyz. Onyń ónimderi óńirge ǵana emes, ózge oblystarǵa da tanymal bolǵan. «Qyzyljar-Qus» fabrıkasy aıaqqa turmasa, bizdiń aımaǵymyz qus etimen ózin qamtamasyz etýge qabiletsiz. Sondyqtan bul joba biz úshin strategııalyq baǵytta bolady», deıdi óńir basshysy.

Pavlodar oblysy,

Aqsý aýyldyq aımaǵy,

Qyzyljar aýyly