Katarda nemis jýrnalısteriniń tutqyndalýy jıilep ketti

ASTANA. 5 mamyr. Katar astanasy – Dohada fýtboldan 2022 jylǵy álem chempıonatyna daıyndyq týraly derekti fılm túsirip júrgen bir top nemis jýrnalısterin jergilikti quqyq qorǵaý organdary tutqynǵa aldy. Bul týraly ntv.ru habarlady. Germanııanyń ARD telearnasynyń korrespondenti Florıan Baýerdiń aıtýynsha, olardyń búginge deıin túsirgen jazbalaryn Katar polıseıleri óshirip tastaǵan. «Bizdi tutqyndap, jergilikti polıseıler men tergeý qyzmetiniń ókilderi suraqtyń astyna aldy. Aldaǵy birneshe kúnniń ishinde bizge Katardan shyǵýǵa tyıym saldy. Sondaı-aq, barlyq jazbamyzdy óshirip, jabdyqtarymyzdy buzyp tastady», – deıdi nemis jýrnalısi. Buǵan deıin Dohada Germanııanyń WDR telearnasynyń qyzmetkerleri tutqyndalǵan bolatyn. Olar da 2022 jylǵy mýndıal týraly derekti fılm túsirý úshin Katarǵa kelgen. Tutqyndalǵan jýrnalısterden memlekettik qaýipsizdik qyzmetiniń ókilderi jaýap alyp, 14 saǵattan keıin bosatqan. Alaıda, jýrnalısterdiń túsirý qurylǵylary, noýtbýkteri jáne uıaly telefondary tárkilengen. Atalǵan tehnıkalar barlyq jazbalary óshirilgen jáne aıtarlyqtaı aqaý kelgen kúıde tórt aptadan keıin qaıtaryldy. Sońǵy kezderi Katarda fýtboldan álemdik dodaǵa daıyndyq barysy týraly fılm túsirýge kelgen Germanııa jýrnalısteri jıi tutqyndalýda. Joǵaryda aıtylǵan eki jaıttan bólek, Germanııanyń taǵy bir top BAQ ókilderi qamaýǵa alynǵan. Olar álem chempıonatyna daıyndyq barysynda eńbek shartynyń buzylýy jaıynda arnaıy materıal daıyndaǵany úshin nazarǵa ilingen. Aıta keteıik, fýtboldan 2022 jylǵy álem chempıonaty Katarda 21 qarasha men 18 jeltoqsan aralyǵynda ótedi. Jaz kezinde Katarda aýa raıy óte ystyq bolýyna baılanysty FIFA dodany qysqy mezgilge aýystyrdy. Elaman Qońyr. Derek, sýret: ntv.ru.