Densaýlyq saqtaý mınıstrligi el turǵyndaryna emshara kabınetterinen qyzmet alý barysynda qaýipsizdik sharalaryn saqtaýǵa keńes beredi. Sebebi osyǵan deıin túsken 7 ótinishtiń árqaısysy boıynsha jospardan tys tekserýler júrgizilgen. Nátıjesinde tıisti lısenzııasyz medısınalyq qyzmetti iske asyrýdyń 4 faktisi, sertıfıkattalǵan mamansyz rásimdik qyzmet kórsetýdiń 3 jaǵdaıy jáne dárilik zattardy saqtaý sharttaryn buzýdyń 2 faktisi tirkelgen.
Tekserý qorytyndysy boıynsha komıtettiń aýmaqtyq departamentteri ákimshilik jaýapkershilik týraly hattamalar toltyrǵan. Salynǵan aıyppuldardyń jalpy somasy 1 mln teńgeden asty. Al sońy ólimmen aıaqtalǵan jaǵdaı boıynsha Jambyl oblysynda qosymsha jospardan tys tekserýler júrgizilgen. Sáıkesinshe dári-dármekter men medısınalyq buıymdardy saqtaý qaǵıdalaryn óreskel buzýshylyqtar anyqtalypty. Anyqtalǵan jaǵdaılar boıynsha materıaldar odan ári tergeý úshin quqyq qorǵaý organdaryna berilip, óńirdegi emshara kabınetteriniń biri qyzmetin resmı túrde toqtatqan.
Búginde Jambyl oblysynda 107 emshara kabıneti jumys istese, onyń 42-sinde ǵana dárigerge deıingi medısınalyq kómekti júzege asyrýǵa lısenzııasy bar eken. Qoldanystaǵy zańnamaǵa sáıkes emshara kabınetterin kez kelgen ýaqytta jospardan tys tekserýge múmkindik joq. Ol úshin azamattardyń resmı ótinishteri nemese memlekettik organdardyń suraý salýy qajet bolady. Taǵy bir joly, quqyq qorǵaý organdarynyń tapsyrmalary kezinde tekseris júrgizilýi múmkin.
Densaýlyq saqtaý mınıstrligi el azamattaryn emsharalyq medısına qyzmetterine júginerde tek lısenzııalanǵan medısınalyq uıymdarǵa habarlasýǵa keńes beredi. Qyzmetkerlerdiń lısenzııasy men biliktiligi bolýyn naqtylaýdy eskertedi.
