Qurlyq áskerleriniń bas qolbasshysy general-maıor Mereke Kóshekbaev qorǵanys vedomstvosynyń basshysyna jeke quram men tehnıkanyń daıyndyǵy týraly baıandady.
«Bólek jattyǵýlar aıaqtalýǵa jaqyn. 25 sáýirden bastap sherýge qatysýshylar jaýyngerlik tehnıka men avıasııa qatysatyn birlesken jattyǵýlarǵa kirisedi. Al 3 jáne 5 mamyrdaǵy negizgi daıyndyq Qazaq eli alańynda ótedi», dedi general-maıor Mereke Kóshekbaev.
Qorǵanys mınıstri jeke quram men mehanıkalandyrylǵan lekterdiń paradtyq eseptoptarynyń ótýin qadaǵalady.
Qorǵanys vedomstvosynyń basshysy áskerı sherýge qatysýshylarǵa alǵysyn bildirdi.
«Búgin sizder elimizdiń Qarýly kúshteri úshin mańyzdy sharaǵa qatysýǵa daıyndalyp jatyrsyzdar. Áskerı sherý jaı ǵana kórinis emes, onyń róli Qazaqstan armııasynyń jaýyngerlik dástúrleri men elimizdiń mádenı murasyn saqtaýda jatyr. Qazaqstanda ákeleri men atalary maıdanǵa ketpegen birde-bir otbasy joq. Sizderdiń búgingi eńbekterińiz – HH ǵasyrdaǵy eń qandy soǵysta erlikpen qaza tapqan ata-babalarymyzǵa degen qurmet», dedi general-polkovnık Rýslan Jaqsylyqov áskerı qyzmetshilerge sóılegen sózinde.
Ol sondaı-aq laýazymdy tulǵalardyń nazaryn sanıtarlyq-epıdemıologııalyq normalardy, turǵylyqty jerlerde belgilengen jylý rejımin saqtaý, jeke quram úshin joǵary kalorııaly tolyq tamaqtanýdy qamtamasyz etý jáne dala lagerinde tártiptiń joǵary deńgeıin saqtaý qajettiligine aýdardy.
Jeńistiń 80 jyldyǵyna arnalǵan ásker parad 7 mamyrda Astananyń basty alańynda ótedi. Oǵan 4 myńnan astam áskerı qyzmetshi, 300-den asa qarý-jaraq pen áskerı tehnıka, onyń ishinde soǵys kezindegi áskerı tehnıkanyń úlgileri men maıdandyq, armııalyq jáne áskerı-kóliktik avıasııasynyń 60-tan astam áýe kemesi qatysady.
