Foto: Aqorda
Prezıdenttiń málimdeýinshe, oblysta náreste óliminiń kórsetkishi tómendep kele jatqanymen, bul kórsetkish respýblıka boıynsha ortasha deńgeıden joǵary qalyp otyr. Qazaqstanda ortasha kórsetkish – 6,01. Sonymen qatar, qaterli isikke shaldyǵý men osy dertten qaıtys bolý jaǵdaılary azaıǵanymen, aýrýdy asqyndyryp alatyn azamattar sany áli de kóp. Oblysta jedel járdem brıgadalary jetispeıdi.
Sonymen qatar Memleket basshysy mektepterde oqýshylardyń jappaı ýlaný faktilerin synǵa aldy. Byltyrdyń ózinde 400-den astam bala, bıyl 42 bala ýlanǵan. Bul – mektepterde azyq-túlik qaýipsizdigi talaptarynyń saqtalmaı otyrǵanynyń aıqyn kórinisi.
«Úkimetke jaýapty memlekettik organdarmen birlesip, oqýshylardyń qaýipsizdigin qatań baqylaýǵa alýdy tapsyramyn. Bilim berý mekemeleri qyzmet kórsetetin uıymdarmen sapaly ári naqty jumys júrgizýi kerek. Ákimdik osyndaı óreskel jaǵdaılarǵa múlde jol bermeýge tıis. Jalpy áleýmettik salanyń mańyzy aıryqsha. Sebebi, biz – áleýmettik elmiz», dedi Prezıdent.
Qasym-Jomart Toqaev elimiz áleýmettik baǵyt ustanatynyn jáne qandaı jaǵdaı bolmasyn, halyq aldyndaǵy mindetterin oryndaýǵa daıyn ekenin erekshe aıtty. Muqtaj azamattarǵa qajetti kómek kórsetiledi, bul – memlekettiń myzǵymas ustanymy.
«Sondaı-aq máseleniń ekinshi jaǵy bar. Áleýmettik jeńildikter men járdemge ıe bolý úshin qıturqy áreketter jasaıtyndar az emes. Tipti áleýmettik alaıaqtyq paıda boldy dep aıtýǵa bolady. Ondaı alaıaqtar memleketke de, qoǵamǵa da zııanyn tıgizip jatyr. Kómek shyn muqtaj adamdarǵa berilýge tıis. Sondyqtan taǵy da qaıtalap aıtamyn, áleýmettik qoldaý júıesin muqııat zerdeleý kerek. Oblys ákimi sırek kezdesetin metaldardyń kózin ashý úshin geologııalyq barlaýdy belsendi túrde júrgizý kerek dep usynys aıtty. Qoldaımyn. Úkimet bul máselege erekshe kóńil bólýi qajet. Osymen kún tártibindegi máseleniń bárin qaradyq. Barlyq tapsyrmalar ýaqtyly oryndalýǵa tıis», dedi Memleket basshysy.
Sóz sońynda Memleket basshysy barlyq tapsyrmalardyń ýaqtyly ári naqty oryndalýy qajet ekenin aıtyp, olardy jeke baqylaýyna alatynyn jetkizdi.
«Qoryta aıtqanda, birinshi talabym – bárimiz adal jumys isteýimiz kerek. Ekinshi talabym – bárimiz ozyq oıly bolýymyz qajet. Úshinshi talabym – jastarymyzǵa durys bilim men tárbıe berip, olarǵa jol ashýymyz kerek. Al Mańǵystaý oblysyna kelsek, biz bul aımaqty jedel damýdyń úlgisi retinde kórsetýimiz kerek. Oblystyń áleýeti zor. Sony tıimdi paıdalanbasaq, bárimizge keshirilmes kúná bolady. Raqmet, barshańyzǵa», dedi Qasym-Jomart Toqaev.
Jıynda Mańǵystaý oblysynyń ákimi Nurdáýlet Qılybaı, Premer-mınıstrdiń orynbasarlary Qanat Bozymbaev pen Ermek Kósherbaev, «QazMunaıGaz» ulttyq kompanııasynyń basqarma tóraǵasy Ashat Hasenov baıandama jasady.
