Qazaqstan Prezıdentiniń keńesshisi taǵaıyndaldy

ASTANA. 5 mamyr. Memleket Basshysynyń О́kimimen Muhtar Abraruly Qul-Muhammed Qazaqstan Respýblıkasy Prezıdentiniń keńesshisi qyzmetine taǵaıyndaldy. Bul týraly akorda.kz habarlady. Muhtar Qul-Muhammed 1960 jyly 12 jeltoqsanda Qytaıdyń Sháýeshek qalasynda týǵan. S.M.Kırov atyndaǵy Qazaq memlekettik ýnıversıtetin bitirgen. Eńbek jolynda «Qazaq ensıklopedııasy» Bas redaksııasynda ǵylymı, aǵa ǵylymı redaktor, fılosofııa, quqyq jáne sosıologııa redaksııasynyń meńgerýshisi, jaýapty hatshy (1982-1992 jj.), «Atamura» korporasııasynyń prezıdenti (1992-1999 jj.), Parlament Senatynyń depýtaty (1999-2001 jj.), Mádenıet, aqparat jáne qoǵamdyq kelisim mınıstri (2001-2003 jj.), Qazaqstan Prezıdentiniń keńesshisi jáne baspasóz hatshysy (2003-2007 jj.), Qyzylorda oblysynyń ákimi (2007-2008 jj.), Mádenıet jáne aqparat mınıstri (2008-2010 jj., 2013-2014 jj.), Mádenıet mınıstri (2010-2012 jj.), Memlekettik hatshy (2012-2013 jj.), Prezıdent keńesshisi (2014-2015 jj.) qyzmetterin abyroımen atqardy. Sońǵy atqarǵan qyzmeti – 2015 jyly 26 sáýirde ótken kezekten tys Prezıdent saılaýynda Nursultan Nazarbaevtyń saılaý aldy shtabynyń basshysy. Muhtar Abraruly qazaq ǵylymynyń damýyna súbeli úles qosty. 100-den astam ǵylymı eńbektiń avtory. Tarıh ǵylymdarynyń kandıdaty (1995 j.), zań ǵylymdarynyń doktory (1999 j.), professor (2000 j.). Nıý-Iork Ǵylym akademııasynyń tolyq múshesi (1997 j.), Qazaqstan Respýblıkasy Áleýmettik ǵylymdar akademııasynyń akademıgi (2001 j.). Qazaqstan Memlekettik syılyǵynyń ıegeri (1996 j.). «Qurmet» (2004 j.) jáne «Parasat» (2010 j.) ordenderimen marapattalǵan. Áskerı sheni – zapastaǵy polkovnık. Elaman Qońyr. Derek: akorda.kz. Sýret: egemen.kz.