Jaqynda J.Aımaýytov atyndaǵy Pavlodar oblystyq qazaq mýzyka-drama teatryna Azııa jáne Eýropa elderindegi teatr ujymdarynyń táýelsiz rejısseri Ovlıakýlı Hodjakýlı keldi. Maıtalman bıylǵy maýsymda pavlodarlyq akterlermen birge sahnada jańa premera usyný týraly oıyn aıtqan edi. Jergilikti teatr ujymymen aqyldasa kele, álemge áıgili dramatýrg Bertold Brehtiń «Mamasha Kýraj» qoıylymyna tańdaý tústi.
«Bul dramadaǵy keıipkerler men akterlerdiń beıneleri bir-birine tym bolmaǵanda 60-70 paıyz uqsaýy mańyzdy edi. Qııalymdaǵy keıipkerlerdi tappasam, aıaq baspaımyn. Aımaýytov teatrynda buryn qoıylǵan spektaklderdi kóre kele, bul qoıylymdaǵy keıipkerler Ertis boıynda bar ekenine kóz jetkizdim. Mundaǵy akterlerdiń basym bóligi – jastar, árqaısysynyń boıynda bulqynys bar. Kúsh-qýaty tasqyndap turatyn adamdar maǵan árdaıym unaıdy. Onyń ústine teatr akterleriniń barlyǵy shetinen ánshi ári kez kelgen bıdi de oryndaı alatyny kózge tústi. Iаǵnı tehnıkalyq jaǵynan da, shyǵarmashylyq jaǵynan da úılesimde. Zamanaýı teatr úshin bul jaıttardyń barlyǵy da mańyzdy. Endeshe, bizdiń jumysymyzda erekshe kollaborasııa bolady dep úmittenemin», deıdi Ovlıakýlı Hodjakýlı.
Teatrdyń kórkemdik jetekshisi Ádilet Aqanov keleshek premeraǵa ázirshe «Peri qatyn» degen shartty ataý berilip otyrǵanyn jetkizdi. Qoıylym Ekinshi dúnıejúzilik soǵystaǵy Jeńistiń 80 jyldyǵyna oraılastyrylǵan.
– Qoıylymnyń aıtar oıy mol, adamnyń jan dúnıesine tereń úńiletin shyǵarma. Álemdik klassıka. Qoıylymdy sahnalaý máneri bólek, akterlerdiń oıyny da erekshelikti talap etedi. Deıturǵanmen, mundaı janrdaǵy shyǵarmalar ujymymyz úshin tańsyq emes ekenin aıtýymyz kerek. Buǵan deıin synshylardyń joǵary pikirine ıe bolǵan «Ujdan» ápsanasy da osyndaı baǵytta sahnalanǵan. Teatr – tiri aǵza, ujym únemi ózgedegi jańalyqty, jańa lepti ózine sińirip, úrdisterge den qoıyp otyrmasa, bir orynda turyp qalady – degen oıymen bólisti Á.Aqanov.
Al sáýir aıynyń sońynda jergilikti kórermenge osetın dramatýrgi Georgıı Hýgaevtyń «Bir dosyń kerek eken» komedııasy usynylmaqshy. Bul premeraǵa qazirgi ýaqytta daıyndyq qyzý júrip jatyr. Qoıýshy rejısser Jangeldi Sadyqovtyń aıtýynsha, komedııalyq qoıylym taǵdyr taýqymeti aralaryna syna qaqqanmen syn saǵatta bir-birin satpaǵan eki dostyń qyzyqty da shytyrman oqıǵasy jaıynda órbıdi. Andro men Sandro esimdi dostar ári kórshiler birin-biri keıde jek kórse de, jaýǵa bermes, qatty ókpelese de, ólimge qımas jandar retinde beınelenedi.
«Kórshilerdiń bir-birimen qarym-qatynasy, syı-qurmeti bala kezimizde ystyq kórinýshi edi. О́kinishke qaraı, shaharlarda osy bir jyly dástúr úzilip barady. Biz osy bir adamı qundylyqtardy qaıta jańǵyrtýǵa shaqyramyz» deıdi rejısser. Jangeldi Sadyqov Aımaýytov teatrynda birneshe qoıylym sahnalaǵan.
Komedııadaǵy basty róldiń biri – Androny somdaıtyn akter, Qazaqstannyń eńbek sińirgen qaıratkeri Dáýren Ádil «qoıylymnyń aıtar oıy – qııametke deıin adal dos taba bilýdiń ózi de óner degen fılosofııa jatyr» dep paıymdaıdy.
– Erterekte osy teatrda «Tabaldyryǵyńa tabyn» degen qoıylym qoıdyq. Spektakl kesh aıaqtalyp, avtobýs toqtap qalady-aý dep aıaldamaǵa kóppen birge asyqtym. Qos ókpemdi qolyma alyp júgirip kele jatsam, aldymda eki kelinshek ketip bara jatyr eken. Jaıaý jol tar, amalsyzdan ekpinimdi saıabyrsytýǵa týra keldi. Álgilerdi basa-kóktep ótýge uıalyp, arttarynan ere túseıin. Sóıtsem kelinshektiń biri kóz jasyn tógip, janyndaǵy qurbysyna bylaı dep keledi eken: «Myna qoıylymdy kúıeýim kórmesin. Eger búgin menimen teatrǵa kelgende bar ǵoı, erteń týra aýylǵa kóshemiz dep qıǵylyq salatyny anyq edi». Sol kúngi spektaklde aýylǵa ata-anasyn qara úzdirip tastap ketken, habar salmaıtyn, amandyǵyn suraspaıtyn bezbúırek adamnyń taǵdyry sıpattalatyn. Sondaǵy aýyr qaıǵyny kókiregine túıgen kelinshektiń sezimtaldyǵyna tańǵaldym. Qoıylymnyń kórermen júregine jetýi degen sondaı bolady eken», dep tolǵandy teatr maıtalmany.
Pavlodar oblysy
