Sýret: ortcom.kz
Temirjolmen jetkizilgen júktiń jalpy kólemi – 2,2 myń tonna. Ol – ósimdik maıy, bıdaı uny, kúrish jarmasy, qysqy jáne jazǵy shatyrlar, kórpeler. Zárý dárilik zattar bar gýmanıtarlyq kómektiń bir bóligi áýe kóligimen jiberiledi. Gýmanıtarlyq kómek «KazAID» qazaqstandyq halyqaralyq damý agenttiginiń qoldaýymen kórsetildi.
Elimizdiń Aýǵanstandaǵy ýaqytsha senimdi ókili Ǵazız Aqbasov atap ótkendeı, Qazaqstan aýǵan halqyn qoldaýdy jalǵastyryp, eki el arasyndaǵy dostyq, saýda-ekonomıkalyq baılanysty damytýdy dáıekti túrde qoldaıdy. Tek gýmanıtarlyq qana emes, taý-ken ónerkásibi, kólik, logıstıka men aýyl sharýashylyǵy salasyndaǵy yntymaqtastyqty tereńdetýge daıyn.
21-23 sáýir aralyǵynda vıse-premer – Ulttyq ekonomıka mınıstri Serik Jumanǵarın bastaǵan Qazaqstan delegasııasy Kabýlǵa barady. Sapar sheńberinde Aýǵanstannyń resmı tulǵalarymen kezdesýler, otandyq taýarlardyń kórmesin ótkizý josparlanyp otyr.
