Premer-mınıstr qurylys alańyn aralaý kezinde bolashaq energııa nysanynyń tehnıkalyq parametrleri jáne jobanyń júzege asyrylý barysymen tanysty. «Samuryq-Energo» AQ basqarma tóraǵasy Qaırat Maqsutov JEO qurylysyna aýdany 227 gektar jer telimi bólingenin, sondaı-aq kúl-qoj qaldyqtaryn jınaıtyn alań úshin qosymsha 130 gektar jer qarastyrylǵanyn baıandady. Stansanyń jobalyq qýaty shamamen 240 MVt, al jylý qýaty keminde 520 Gkal/saǵ bolady. Sonymen qatar qalanyń keleshektegi ósimi men óńirdiń qajettilikterin eskere otyryp, qosymsha sý jylytý qazandyqtaryn ornatý arqyly jylý qýatyn taǵy 300 Gkal/saǵatqa deıin arttyrý múmkindigi qarastyrylyp jatyr.
Aıta keteıik, qazirgi ýaqytta birqatar bastapqy jumys aıaqtalǵan. Atap aıtqanda, kúshtik transformator ornatylyp, ýaqytsha joldar men qurylys shtaby salyndy.
Jalpyulttyq koalısııa músheleri Aqtóbe JEO ujymymen Konstıtýsııa jobasyn talqylady
Qaırat Maqsutovtyń aıtýynsha, kelesi aıdan bastap joba belsendi qurylys kezeńine ótedi. Jabdyqtardy jetkizý 2027 jyldyń I toqsanyna josparlanǵan. Energııa nysandarynyń qurylysyna shamamen 2,5 myń adam tartylady, al paıdalanýǵa berý kezeńinde 400-ge jýyq turaqty jumys orny ashylady.
«Joba aıasynda kásiporynnyń ekologııalyq qaýipsizdigine erekshe mán berilgen. JEO-da «taza kómir» tehnologııasy engiziledi. Tútin gazyn keshendi tazartý júıesi tómen emıssııaly qyzdyrǵyshtar, katalızatorlar jáne elektr súzgilerdi qamtıdy. Sonymen qatar tútin gazdaryn óńdeý kezinde qurylys salasynda paıdalanýǵa jaramdy gıps túziletin kúkirt tazartý reaktory ornatylady. Osylaısha, stansa QR Ekologııalyq kodeksi talaptaryna tolyq sáıkes bolady», dep habarlady Úkimettiń baspasóz qyzmeti.
Úkimet basshysy Kókshetaý JEO-synyń qurylysy óńir ınfraqurylymyn damytý jáne onyń ósip kele jatqan qajettilikterin eskere otyryp, halyqty sapaly ári úzdiksiz jylý-energııamen qamtamasyz etý úshin erekshe mańyzdy ekenin atap ótti. Tek Kókshetaý qalasynyń ózinde 2035 jylǵa deıingi kezeńde jylý energııasyna degen qajettilik saǵatyna 840 Gkal-dan asady dep boljanyp otyr. Jyl saıyn qalada 200-240 myń sharshy metr turǵyn úı paıdalanýǵa beriledi. Sonymen qatar jańa áleýmettik nysandar – mektepter, aýrýhanalar, sport mekemeleri ashylýda.
«Stansanyń iske qosylýy ósip kele jatqan suranysty qanaǵattandyrýǵa, qýat rezervin qalyptastyrýǵa jáne jylý júıesiniń uzaqmerzimdi turaqty jumysyn qamtamasyz etýge múmkindik beredi. Jobany júzege asyrý nátıjesinde Kókshetaýdyń 195 myńnan astam turǵyny, onyń ishinde Stansıonnyı kentiniń halqy jylýmen qamtylady. Sonymen qatar 600-ge jýyq kóppáterli turǵyn úı ystyq sýmen qamtamasyz etiledi. JEO qurylysy qalanyń damýyna serpin berip, jańa kásiporyndardyń ashylýyna yqpal etedi. «Samuryq-Energo» AQ málimetinshe, jobany 2029 jyldyń naýryz aıynda aıaqtaý josparlanǵan», delingen habarlamada.
Energetıka mınıstrliginiń málimetinshe, sońǵy jyldary respýblıka boıynsha apatty jaǵdaıda turǵan JEO sany aıtarlyqtaı azaıǵan. Buǵan deıin jumys istep turǵan 37 JEO-nyń 19-y «qyzyl» aımaqta, 11-i «sary» jáne 7-ýi «jasyl» aımaqta bolǵan. О́tken jylytý maýsymynyń qorytyndysy boıynsha jaǵdaı jaqsardy: 9 stansa «qyzyl» aımaqtan «sary» aımaqqa, taǵy 3 stansa «sarydan» «jasyl» aımaqqa kóshti. Nátıjesinde, qazirgi ýaqytta 17 JEO – «sary» aımaqta, 10 – «jasyl» aımaqta.
Premer-mınıstr jaýapty mınıstrlikterge, jergilikti atqarýshy organdar men tıisti uıymdarǵa barlyq qordalanǵan máseleni jedel túrde sheship, jumysty belgilengen merzimnen keshiktirmeı, kidirissiz ári ýaqtyly júzege asyrýdy tapsyrdy.
