Foto: egemen.kz/Erlan Omar
Memleket basshysynyń kómekke muqtaj jandardyń jıyntyq kirisi men shyǵysyn aıqyndaýdy eskere otyryp, halyqqa áleýmettik kómek kórsetý tetigin jetildirý jóninde sharalar qabyldaýǵa qatysty tapsyrmasyn oryndaý maqsatynda Eńbek jáne halyqty áleýmettik qorǵaý mınıstrligi ataýly áleýmettik kómekti taǵaıyndaý qaǵıdalaryna ózgerister engizip otyr. Jańa buıryq jobasyna sáıkes AÁK alýǵa úmitti azamat memleketke shyǵys operasııalaryn, ıaǵnı bank shoty, bank aldyndaǵy qaryzy, mıkrokredıti (bolǵan jaǵdaıda), jınaq salymy men depozıttegi qarajatynyń qozǵalysy týraly málimetterdi usynýy tıis.
«Maqsat – jıyntyq kirisi men shyǵysyn aıqyndap, kómekke naqty muqtaj azamattarǵa áleýmettik qoldaý kórsetý. Ataýly áleýmettik kómek taǵaıyndaý tetigindegi ózgerister kómekke shyn máninde muqtaj azamattardy anyqtaýǵa jáne olarǵa memleket tarapynan nysanaly qoldaýdy qamtamasyz etýge múmkindik beredi», delingen qujat mátininde.
Ataýly áleýmettik kómekti jańa tártippen taǵaıyndaý memlekettik qoldaýdyń ashyqtyǵyn kúsheıtýge yqpal etedi. Qujat jobasy bıyl 5 mamyrǵa deıin qoǵamdyq talqylaýǵa usynylǵan. Jańa tártip qabyldanǵan jaǵdaıda bıyl jeltoqsanda iske qosylady.
Qazirgi ýaqytta elimizde AÁK-ti otbasynyń bir múshesiniń ortasha tabysy kedeılik sheginen tómen adamdar ala alady. Oǵan elimizdiń azamattary, qandastar, bosqyndar, elimizde turaqty turatyn azamattyǵy joq adamdar úmit arta alady. Bir adamǵa shaqqandaǵy ortasha tabys otbasy músheleriniń sanyna bólingen jalpy tabysy retinde esepteledi. Bıyldan bastap elimizdegi kedeılik shegi memlekettik ataýly áleýmettik kómekke ótinish bergen toqsandaǵy medıandy tabystyń 35 paıyzyna teń, biraq sol kezeńdegi óńirlik eń tómengi kúnkóris deńgeıiniń 70 paıyzynan kem emes. Qazaqstandyqtar AÁK taǵaıyndaýǵa ótinishti mansap ortalyǵyna, turǵylyqty jeri boıynsha ákimdikke nemese elektrondyq úkimet portaly arqyly bere alady (egov.kz). Ol úshin Qazaqstanda turaqty turatyn sheteldiktiń jeke kýáligi ne turýǵa yqtııarhaty, azamattyǵy joq adamnyń kýáligi, bosqyn kýáligi ne qandas kýáligi bolýy jetkilikti.
Eńbek mınıstrliginiń málimetinshe, byltyr AÁK tóleýge 39,5 mıllıard teńge jumsalǵan. Ony 78,1 myń otbasynan 413,7 myń adam aldy. Bıyl AÁK tóleýge 1 mıllıon adamǵa 132,9 mıllıard teńge qarastyrylǵan.
