Foto: UPL.uz
Joba Iman Chocolate & Fruits kompanııasynyń bastamasymen júzege asqan.
Mýzeıge kelýshilerge shokoladtyń paıda bolý tarıhynan bastap, zamanaýı kondıterlik tehnologııalarǵa deıingi damý joly tanystyrylady. Ekspozısııada ejelgi órkenıetterdiń taǵam mádenıeti, sonymen qatar álemdik sáýlet týyndylary men tarıhı tulǵalardyń shokoladtan jasalǵan músinderi qoıylǵan.
Barlyǵy 19 erekshe eksponat usynylǵan. Onyń ishinde 16-syn mýzeıi sheberleri qoldan daıyndaǵan. Kórmede Tashkent pen Samarqandtaǵy áıgili medreseler, Kelte munara, Álisher Naýaı men Ámir Temirdiń beıneleri, sondaı-aq Táj-Mahal, Azattyq músini, Eıfel munarasy, Kolızeı men Tanostyń qoly sııaqty jahandyq sımvoldar shokolad túrinde jasalǵan.
850 keli shokolad jumsalǵan bul týyndylardyń kópshiligi qara shokoladtan daıyndalsa, eki músin aq shokoladpen beınelengen. Árbir kompozısııany jasaýǵa kem degende jeti kún ketken. Shokolad músinderi arnaıy lakpen jabylǵan jáne qajetti jaǵdaıda bir jylǵa deıin saqtalady.
Mýzeıde shokolad óndirisiniń búge-shúgesine deıin kórsetilgen arnaıy sheberhana jumys isteıdi. Sonymen qatar aldaǵy ýaqytta tájirıbeli kondıterlerdiń qatysýymen sheberlik sabaqtary da ótedi dep josparlanyp otyr.
Bul mádenı joba О́zbekstandaǵy gastronomııalyq týrızmdi damytýdyń jańa bir baǵytyna aınalyp, ulttyq tátti ónimder ónerin kópshilikke tanytýǵa sep bolmaq.
