ASTANA. 5 mamyr. Endi birer saǵattan keıin fýtboldan ÝEFA Chempıondar lıgasynyń jartylaı fınaldyq básekesi bastalady. Búgin Italııanyń Týrın qalasynda jergilikti «Iýventýs» pen Madrıdtiń «Realy» alǵashqy oıyndaryn ótkizedi. Al erteń «Barselona» óz alańynda Mıýnhenniń «Bavarııasyn» qabyldaıdy. Bul týraly egemen.kz habarlady.
Osy rette biz ádettegideı, búgingi matchqa qatysty keıbir qyzyqty derekterge toqtalýdy jón kórdik. Sonymen «Iýventýs» pen «Real» arasyndaǵy birqatar málimetterge nazar aýdaraıyq.
- Búgingi oıyn týraly aıtqan kezde eń aldymen Chempıondar lıgasynyń 1997-1998 jylǵy maýsymyndaǵy fınal eske túsedi. Sebebi, sol synda «Iýventýs» pen «Real» chempıondyq ataqty sarapqa salǵan bolatyn. Nátıjesinde ıspandar 1:0 esebimen jeńiske jetip, tarıhynda jetinshi ret týrnır jeńimpazy atandy. Atalǵan matchtaǵy jalǵyz goldy dańqty fýtbolshy Predrag Mııatovıch soqty.
- «Iýventýs» týrnır aıasynda «Realǵa» qarsy óz alańynda ótkizgen oıyndarda bir-aq ret jeńilgen. Onyń ózi osydan jarty ǵasyr buryn, ıaǵnı, 1961-1962 jylǵy maýsymda tirkelgen.
- Búginge deıin qos komanda 16 ret kúsh synasyp, onyń 7-ýinde týrındikter basym túsken. Al 8 márte «Realdyń» mereıi ústem boldy. Bir oıynda qarsylastar teń tarqasty.
- «Iýventýs» 2002-2003 jylǵy maýsymnan beri Chempıondar lıgasynyń jartylaı fınalyna alǵash ret shyǵyp otyr.
- Al madrıdtikter besinshi ret qatarynan týrnırdiń jartylaı fınalynda baq synamaq.
Komandalar myna quramda alańǵa shyǵýy múmkin.
