Fýtbol. Qazaqstan Kabo-Verdemen joldastyq kezdesý ótkizedi

ASTANA. 5 mamyr. Fýtboldan Qazaqstan quramasy 16 maýsymda kezekti joldastyq kezdesýin ótkizedi. Atalǵan oıyndaǵy qarsylasymyz Afrıka qurlyǵynyń ókili – Kabo-Verde quramasy. Bul týraly Qazaqstan fýtbol federasııasynyń resmı saıty kff.kz habarlady. Federasııanyń halyqaralyq bóliminiń jetekshisi Tulpar Mansurov joldastyq kezdesý jóninde: «Qazirgi ýaqytta aldyn ala kelisim jasaldy. Endi resmı jumystar qaldy. Bul halyqaralyq matchty uıymdastyrýdyń sheshýshi bóligi bolyp sanalady. Degenmen, Qazaqstan – Kabo-Verde kezdesýi 16 maýsym kúni Almatynyń Ortalyq stadıonynda ótedi dep 99 paıyz senimmen aıtýǵa bolady», – dedi. Búginde Kabo-Verde quramasy FIFA reıtınginde 37-orynda tur. Bul komanda 31 naýryzda álemdegi azýly quramalardyń biri Portýgalııany jeńip ketip, fýtbol mamandarynyń nazaryna ilikti. Eki márte Afrıka halyqtarynyń kýbogyna (2013, 2015 jj.) qatysqan. Eń úzdik kórsetkishi – shırek fınal (2013 j.). Komandany portýgalııalyq maman Rýı Agýash jattyqtyrady. Fýtbolshylary Ispanııa, Anglııa jáne Portýgalııanyń komandalarynda oınaıdy. Al Iýrıı Krasnojan jattyqtyratyn Qazaqstan quramasy qazirgi tańda FIFA tiziminde 133-satyda keledi. Sońǵy oıyndy fýtbolshylarymyz 31 naýryzda Reseı quramasyna qarsy ótkizdi. Atalǵan joldastyq kezdesýde esep ashylmaǵany esimizde. Ulttyq quramamyzdyń Kabo-Verdemen bolatyn oıynǵa deıin eki kezdesýi josparlanǵan. Aldymen 12 mamyrda taǵy bir afrıkalyq qurama Býrkına-Fasomen joldastyq kezdesý ótkizedi. Al arada bir aı ótkende, ıaǵnı, 12 maýsymda 2016 jylǵy Eýropa chempıonatyna irikteý týrnıri aıasynda Túrkııamen kúsh synasady. Atalǵan eki oıyn da Almatyda ótedi. Elaman Qońyr. Derek, sýret: kff.kz.