Oblys ortalyǵy Oralda Mádenıet jáne aqparat mınıstrligi men Batys Qazaqstan oblysy ákimdigimen seriktestikte «Samuryq-Qazyna» AQ biryńǵaı qaıyrymdylyq operatory «Samruk-Kazyna Trust» qorynyń qoldaýymen «OzgeEpic Oral» kreatıvti haby jumysyn bastady. О́ner, tehnologııa jáne zııatkerlik izdenisti biriktiretin ortalyqtyń saltanatty ashylýyna oblys ákimi Narıman Tóreǵalıev, «Samuryq-Qazyna» qorynyń basqarýshy dırektory Ǵıbrat Aýǵanov, kreatıvti jastar men shyǵarmashylyq qaýym ókilderi qatysty. Joba Memleket basshysy Qasym-Jomart Toqaevtyń shyǵarmashylyq ındýstrııany damytý jónindegi tapsyrmasyna sáıkes júzege asyrylyp otyr.
Jobaǵa «Samruk-Kazyna Trust» qory 211 mln teńge bóldi. Bul qarjy ǵımarattyń dızaınyna, keńistikti zamanaýı jıhazben jáne joǵary tehnologııalyq jabdyqtarmen jabdyqtaýǵa jumsaldy. Aldaǵy ýaqytta kreatıvti ındýstrııa salasynda 200 jańa maman daıarlanady. Sonyń ishinde 10 maman-anımatordy oqytý arqyly oblysta alǵashqy anımasııalyq stýdııa qurý josparlanyp otyr.
«Búgin daryndy jastar men shyǵarmashylyq salanyń azamattary úshin mańyzdy kún. Sebebi halyqqa qajetti, suranystaǵy túrli kontent daıyndaıtyn ári kreatıvti mamandardyń kásibı ortasyn qalyptastyratyn orta paıda boldy. Oraldaǵy ortalyq – «Samuryq-Qazyna» qorynyń elimizde ashqan úshinshi kreatıvti haby. Osyǵan deıin Aqtóbe men Petropavlda paıdalanýǵa berildi. Jalpy, Batys Qazaqstanda keıingi tórt jylda 1,5 mlrd teńge bolatyn 16 áleýmettik joba jasadyq. Solardyń biri jyl saıyn 700 erekshe bala kómek alatyn «Qamqorlyq» ońaltý ortalyqtary. Qazirgi tańda tasqyn saldarynan zardap shekken Jańaómir aýylynda kópfýnksıonaldy sport keshenin salý josparlanǵan. Bul da Qor kompanııalar tobynyń óńirlerdiń ınfraqurylymyn damytýǵa, halyqty áleýmettik qoldaýǵa jasap jatqan qadamynyń biri», dedi «Samuryq-Qazyna» AQ basqarýshy dırektory Ǵıbrat Aýǵanov.
«OzgeEpic Oral» haby eki qabattan turady: tómengi qabatta – teatr, konserttik alań, kınozal, kitaphana men kafeterıı, al joǵarǵysynda – galereıa, mýzeı, dárishana, kovorkıng, AI zerthanasy, mýltımedııalyq kórme jáne óndiristik sehtar bar. Munda turǵyndar spektaklder men anımasııa jasaýǵa, dýblıajǵa jáne basqa da shyǵarmashylyq jobalarǵa mentorlar jetekshiligimen qatysa alady. Hab kreatıvti jastardy biriktiretin zamanaýı medıakontent ortalyǵyna aınalmaq. Sonymen birge shyǵarmashylyq pen kásipkerlikti ushtastyrý mindeti bar.
Aıta keteıik, 2020 jyldan beri «Samruk-Kazyna Trust» qory Batys Qazaqstan oblysynda jalpy somasy 1 mlrd 494 mıllıon teńgeni quraıtyn 16 áleýmettik jobany qoldaǵan bolatyn.
Batys Qazaqstan oblysy
