Foto: Ashyq derekkóz
Mınıstrliktiń habarlaýynsha, elimizde BBQ-ny satýǵa tek Keden odaǵynyń tehnıkalyq reglamentterine sáıkestigi rastalyp, memlekettik tirkeýden ótkennen keıin ǵana ruqsat beriledi. Bul prosesti Sanıtarııalyq-epıdemıologııalyq baqylaý komıteti Qazaq taǵamtaný akademııasy jáne EAEO elderiniń ǵylymı-zertteý ınstıtýttary usynǵan saraptamalyq qorytyndylar negizinde júzege asyrady.
Aıta keteıik, satýǵa deıin barlyq BBQ-lar mindetti túrde mıkrobıologııalyq, toksıkologııalyq jáne fızıka-hımııalyq kórsetkishter boıynsha zerthanalyq zertteýlerden ótedi. Sonymen qatar quramyndaǵy dárýmender men bıoaktıvti zattardyń normalary jáne tyıym salynǵan komponentterdiń bolmaýy da qatań tekseriledi.
«Jańa baqylaý sharalary 2024 jyldan bastap BAQ pen áleýmettik jelilerdegi BBQ jarnamasyna monıtorıng júrgiziledi. Sonymen qatar 2025 jyly ónimniń jetkizý tizbeginiń ashyqtyǵyn qamtamasyz etetin, tutynýshyǵa deıingi jolyn baqylaıtyn, arnaıy sáıkestendirý quraldarymen tańbalaý boıynsha pılottyq joba iske qosylady», delingen habarlamada.
Mınıstrlik atap ótkendeı, kelesi jaǵdaılarda BBQ-lardy satýǵa tyıym salynady:
- Memlekettik tirkeý kýáligi joq bolsa;
- Jaramdylyq merzimi aıaqtalǵan jaǵdaıda;
- Saqtaý sharttary saqtalmasa;
- Qaptamada ónimniń quramy, qarsy kórsetilimderi nemese óndirýshi týraly aqparat bolmasa.
Sondaı-aq, vedomstvo azamattarǵa BBQ-ny qabyldamas buryn mindetti túrde dárigermen keńesýge keńes beredi. Sebebi baqylaýsyz qoldaný, ásirese, sozylmaly aýrýy bar adamdar, júkti áıelder men balalar úshin qaýipti bolýy múmkin.
BBQ satyp alarda: ónimniń elimizde tirkelgenin, quramynyń tolyq kórsetilgenin, óndirýshi men eldiń naqty kórsetilgenin, jaramdylyq merzimi men saqtaý sharttarynyń durys ekenin jáne tańbalaý talaptaryna saı keletinin mindetti túrde tekserý qajet.
Densaýlyq saqtaý mınıstrligi BBQ aınalymyn baqylaý salasynda ashyqtyq pen qaýipsizdikti qamtamasyz etý baǵytyndaǵy jumysyn jalǵastyra beretinin málimdedi.
