Foto: QazMunaıGaz UK AQ
Aýqymdy jańǵyrtý jobasy ELOÝ-AVT munaıdy bastapqy óńdeý qondyrǵysyn jetildirýge baǵyttalǵan. Negizgi maqsat – munaı óńdeý kólemin jylyna 1,5 mıllıon tonnaǵa deıin arttyrý. Osy maqsatta jańa tehnologııalyq jabdyqtar ornatylyp, eskileri almastyryldy.
«Mańyzdy kezeńderdiń biri — naýryz aıynda bıiktigi 40 metr jáne salmaǵy 140 tonna bolatyn jańa T-1102 vakýýmdy baǵanany kúrdeli montajdaý jumystary boldy. Bul jabdyq mazýt óńdeýdi ulǵaıtýǵa jáne jańa sý saqınaly vakýým jasaý júıesin qosa alǵanda ozyq tehnologııalardy paıdalana otyryp, jol bıtýmyn óndirý úshin negizgi shıkizat bolyp tabylatyn joǵary sapaly gýdron alýǵa múmkindik beredi. Vakýýmdy baǵanamen qatar qondyrǵynyń atmosferalyq bóligi, tehnologııalyq peshter, jylý almasý jáne sorǵy jabdyqtary modernızasııadan ótti, sonymen birge avtomattandyrý jáne baqylaý júıeleri de jańartyldy», dep habarlaıdy «QazMunaıGaz» UK AQ
Aıta keteıik, qurylys-montajdaý jumystary 2024 jyldyń qarasha aıynda bastalǵan, bas merdiger CITIC Construction kompanııasy. Joba táýlik boıy úzdiksiz jumys rejıminde 220-dan astam mamandy tarta otyryp júzege asyrylǵan. Nátıjesinde joba belgilengen merzimnen bir aı buryn aıaqtalyp, ınvestısııa kólemi 76 mıllıon AQSh dollaryn quraǵan.
Caspi Bitum zaýytynyń resmı iske qosylýy jáne jobalyq qýatqa shyǵýy 2025 jylǵy mamyr aıynyń basyna josparlanǵan.
Bul joba Qazaqstan úshin strategııalyq mańyzdy. Jańǵyrtýdyń arqasynda bıtým óndirisi jylyna 500 myń tonnadan 750 myń tonnaǵa deıin artady.
