Bul týraly Kólik mınıstrliginiń baspasóz qyzmeti habarlady. Burynǵy temirjol vokzaldary buzylyp, qaıta salynady dep josparlanýda. Joba týraly tolyǵyraq Kólik mınıstri Marat Qarabaev aıtty.
«Mańǵystaý vokzalynyń aýdanyn 10 esege ulǵaıtamyz. Temirjol nysany zamanaýı úlgide jańartylady. Ǵımarat úsh qabattan turady. Biz erekshe qajettilikteri bar adamdarǵa qolaıly jaǵdaı jasaýǵa basa nazar aýdaramyz», dedi ol.
Mınıstrdiń aıtýynsha, jańa ınfraqurylym barlyq sanattaǵy azamattardyń qajettilikterine beıimdeledi. Vokzal ǵımaratynda uzaq merzimdi demalys bólmeleri, balaly analarǵa arnalǵan bólmeler, keń kútý zaldary, sondaı-aq eskalatorlar bolady.
«Sáıkesinshe, jolaýshylar aǵyny birneshe ese artady. Bul týrızmdi damytýǵa septigin tıgizedi», dedi mınıstr.
Olar Shetpedegi temirjol vokzaly qazirgi ǵımarattan 5 ese, Beıneýdegi 10 ese úlken bolady dep ýáde berip otyr.
«Bıyl temirjolshylar jalpy uzyndyǵy 404 shaqyrymdy quraıtyn "Beıneý-Mańǵystaý" temir jol ýchaskesin jańartady. Shalqar-Beıneý, Mańǵystaý-О́zen ýchaskesinde (jalpy uzyndyǵy - 651 shaqyrym) poıyz qozǵalysyn basqarýdyń jańa júıesi (avtomatty bloktaý) ornatylady», dep habarlady vedomstvodan.
Joba Prezıdenttiń týrıstik baǵyttardyń qoljetimdiligin arttyrý jáne eldiń kólik jelisin jańǵyrtý jónindegi tapsyrmasy aıasynda júzege asyrylýda. Qazaqstanda barlyǵy 125 temirjol vokzalyn qaıta qurý bastaldy, onyń 21-i týrıstik baǵyttarǵa qyzmet kórsetedi.
