«Aýylda densaýlyq saqtaýdy jańǵyrtý» ulttyq jobasyn iske asyrý sheńberinde birqatar bastama kóterildi. Qaıtarylǵan qarajat 11 medısınalyq, feldsherlik-akýsherlik pýnkt, sondaı-aq dárigerlik ambýlatorııanyń qurylysyn qarjylandyrady. Josparǵa sáıkes, bıyl Aqtóbe oblysynyń birneshe aýdanynda jańa medısınalyq nysandar salynady. Atap aıtqanda, Yrǵyz aýdanynyń Nura aýylynda, Baıǵanın aýdanynyń Noǵaıty aýylynda feldsherlik-akýsherlik pýnktter boı kóteredi. Sonymen qatar Shalqar aýdanynyń Shoqysý, Sarysaı, Toǵyz aýyldarynda, Muǵaljar aýdanynyń Jaryq aýylynda, Qobda aýdanynyń Begaly aýylynda, Yrǵyz aýdanynyń Jarma aýylynda medısınalyq pýnktter ashylady.
– Qazir Jaryq aýylynda jas maman retinde jumys istep jatyrmyn, mýzyka páninen sabaq beremin. Aýylda kóptegen ózgeris bolyp jatyr: balalarǵa arnalǵan oıyn alańy salynýda, sonymen qatar kópten kútken jańalyq, aýylymyzǵa gaz keldi, turǵyndardyń qýanyshynda shek joq. Budan basqa, medısınalyq pýnkt salý josparlanyp jatyr. Ol múmkindiginshe tezirek paıdalanýǵa beriledi dep úmittenemiz, – dedi Muǵaljar aýdany Jaryq aýylynyń turǵyny Qýanysh Nursát.
Dárigerlik ambýlatorııalar Muǵaljar aýdanynyń Qaıyńdy, Muǵaljar aýyldarynda, Alǵa aýdanynyń Marjanbulaq aýylynda salynbaq. Bul mekemelerdiń barlyǵy táýligine 25-45 kelýshige qyzmet kórsetýge eseptelgen. Bul óz kezeginde jergilikti turǵyndarǵa sapaly medısınalyq qyzmettiń joǵary qoljetimdiligin qamtamasyz etedi.
– Byltyr bizdiń aýylda asfalt tóselip, joldar salyndy. Aýylda medısınalyq pýnkttiń qurylysy da júrgizilip jatyr. Jalpy, mundaı áleýmettik nysandar barlyq eldi mekenge qajet. Buryn medısınalyq qyzmet alý úshin kórshiles Bershúgir aýylyna barýǵa týra keletin, endi mundaı medısınalyq pýnkt bizdiń aýylda da ashylady. Ol bıyl iske qosylady. Aýylymyzdyń atynan osy jumysty uıymdastyratyn jáne oǵan qatysatyn azamattarǵa zor alǵysymyzdy bildiremiz, – dedi Shalqar aýdany Sarysaı aýylynyń turǵyny Nurlan Orazov.
Aqtóbe oblysyndaǵy medısınalyq mekemelerdiń qurylysyn júzege asyrý – áleýmettik jaǵdaıdy jaqsartýǵa, sondaı-aq turǵyndar úshin densaýlyq saqtaý salasynyń qoljetimdiligin arttyrýǵa baǵyttalǵan mańyzdy qadam.
