Beıbitshilik jáne kelisim saıabaǵynda ótken is-sharaǵa 200-ge jýyq adam qatysyp, shaǵan jáne basqa da kópjyldyq aǵashtardyń kóshetteri otyrǵyzyldy, saıabaqtyń aýmaǵy tazartyldy. Parlament Senatynyń tóraǵasy Máýlen Áshimbaev elimiz úshin mundaı ekologııalyq aksııalardyń mańyzdy ekenine nazar aýdardy.
«Prezıdent Qazaqstan halqy Assambleıasynyń jyl saıynǵy sessııasynda sóılegen sózinde «Taza Qazaqstan» jalpyulttyq ekologııalyq aksııasyna basa mán berdi. Memleket basshysy bul bastama óskeleń urpaqtyń boıyna durys qundylyqtardy sińirýge jáne olarǵa ozyq bilim men tálim-tárbıe berýge septigin tıgizetin ıgilikti is ekenin aıtty. Sondaı-aq atalǵan aksııa, shyn máninde, shynaıy otanshyldyqtyń kórinisi ekeni anyq. Búgin dál osyndaı qurammen Beıbitshilik jáne kelisim saıabaǵynda senbilik ótkizýimizdiń sımvoldyq máni zor dep esepteımin. О́ıtkeni bıyl Astanada rýhanı jáne halyqtyq dıplomatııany ilgeriletýge yqpal etetin Álemdik jáne dástúrli dinder kóshbasshylarynyń VIII sezi ótedi», dedi M.Áshimbaev.
Senat tóraǵasy saıabaqtaǵy ortalyq ınstallıasııada júrgizilip jatqan jumystardyń barysymen tanysty. Demalys orny bıyl Astanada ótetin «Dinder dıalogi: bolashaq jolyndaǵy sınergııa» atty Álemdik jáne dástúrli dinder kóshbasshylarynyń VIII sezi aıasynda ashylady dep josparlanyp otyr. Palata spıkeri áriptesterimen birge osy máseleni de talqylady.
Beıbitshilik jáne kelisim saıabaǵynyń negizin 2022 jyly Álemdik jáne dástúrli dinder kóshbasshylarynyń VII sezine qatysýshylar qalady. Olardyń qatarynda Rım Papasy Fransısk, Ál-Azhardyń Joǵarǵy ımamy Ahmed at-Taıeb, Izraıldiń bas ravvınderi jáne álemdik dinderdiń basqa da ókilderi bar.
