R.Múlkemanov bul qyzmetti 2022 jyldan beri atqaryp kelgen.
Sonymen birge qaıǵyly oqıǵaǵa baılanysty birneshe laýazymdy tulǵalar jazalandy. Atap aıtqanda Shymkent qalalyq energetıka jáne kommýnaldyq sharýashylyq basqarmasynyń basshysyna qatań sógis berilse, osy salaǵa jaýapty qala ákiminiń orynbasary sógis arqalady.
Munan ózge jumysyna salǵyrttyq tanytyp sonyń saldarynan ólimge sebepker bolǵany úshin 2 kásipker qamaýǵa alyndy. Shymkent qalalyq polısııa departamenti osyǵan qatysty mynadaı resmı málimdeme jasady.
«12 sáýirde Qarataý aýdany aýmaǵynda qorshalmaǵan, sýǵa toly shuńqyrdan 7 jasar balanyń óli denesi tabylǵan bolatyn. Atalǵan jaıt boıynsha qylmystyq is qozǵaldy. Tergeý barysynda eki merdigerlik kompanııa qurylys jumystary barysynda qaýipti aýmaqty qorshaý jáne eskertý belgilerin qoıý boıynsha mindetterin oryndamaǵany belgili boldy. Polısııamen atalǵan kompanııalar basshylary adam ólimine ákep soqqan qurylys qyzmeti salasyndaǵy normatıvterdiń talaptaryn buzǵany úshin ustalyp, qamaýǵa alyndy. Qazirgi tańda oqıǵanyń barlyq mán-jaıyn anyqtaýǵa baǵyttalǵan keshendi tergeý jumystary júrgizilýde. Polısııa mundaı qaıǵyly oqıǵalardyń aldyn alý maqsatynda qaýipsizdik talaptaryn qatań saqtaýǵa shaqyrady».
Shymkent qalalyq energetıka jáne kommýnaldyq sharýashylyq basqarmasynyń basshysy Rzabek Meńdiqulovtyń málimdeýinshe qazir ákimdik demeýshiler esebinen shuńqyrdy bekitip ornyn jóndeýge shuǵyl kirisip jatyr.
«Shuńqyr turǵan aımaq Turan-1 shaǵynaýdanyndaǵy eń oıpań jer. 2018 jylǵy konkýrs boıynsha ol jerden jol túsýi kerek edi. Alaıda «Aqjol» merdiger kompanııasy jumysty durys atqarmaı, sonyń kesirinen atalǵan aýmaqta jańbyr sýy tolyp qala beretin. Oǵan qosa sol aımaqtan ótken káriz júıesiniń de sýy kep qosylatyn. Sapasyz qyzmetine baılanysty jol isteýshi merdiger kompanııanyń jumysy 2021 jyly ákimdik tarapynan qabyldanbaıdy. Sóıtedi de kelisimshart ári qaraı bireshe jylǵa sozylyp ketedi. 2024 jyly da ákimdik jol sapasyz salynǵandyqtan ony qabyldap alýdan bas tartady. Sondyqtan shuńqyr paıda bolǵa aımaqtaǵy jol qazirgi tańda ákimdiktiń balansynda emes. Degenmen kommýnaldyq basqarma «Aqjol» merdiger kompanııasyn sotqa berdi. Sondaı-aq sol aýmaqtan káriz júıesin júrgizgen taǵy bir merdiger mekemege qatysty sot bizdiń bergen talap aryzymyzǵa oraı oń sheshim shyǵardy. Iаǵnı sot kezinde káriz júıesin salǵan kompanııaǵa oryn alǵan aqaýlardy óz esebinen jóndeýge mindettedi» dedi ol.
Qala ákiminiń orynbasary Sársen Quranbek arnaıy brıfıngte bergen málimdemesinde bir jyl boıy ashyq jatqan shuńqyr orny bir aı ishinde qalpyna keltiriletinin aıtty. Sondaı-aq bul jaǵdaı qala ákimi Ǵ.Syzdyqbekov kelmeı turyp bolǵanyn eske saldy.
