Kórme Majarstannyń Qazaqstandaǵy Elshiligimen birlesip uıymdastyrylyp, tanymal majar shyǵystanýshysy jáne saıahatshysy Armınıýs Vamberıdiń eńbekterine arnaldy. Ekspozısııada onyń 1868 jyly jaryq kórgen «Ortalyq Azııaǵa saıahat» atty kitabynan sıfrlanǵan fotomaterıaldar men tarıhı sýretter toptamasy qoıyldy. Kórmege Ǵylym jáne joǵary bilim mınıstrligi men Syrtqy ister mınıstrliginiń ókilderi, dıplomatııalyq korpýs músheleri, tarıhshylar, halyqaralyq sarapshylar jáne jýrnalıster qatysty.
«Maqsut Narikbayev University-degi bul kórme – túrkitaný ǵylymynyń damýy men Majarstanda qalyptasýyn kórsetetin mańyzdy oqıǵa. Armınıýs Vamberı – álemdik túrkitanýdyń negizin qalaýshylardyń biri. Ol Ortalyq Eýropaǵa qonystanǵan majar taıpalarynyń shyǵý tegin zertteýge bar ǵumyryn arnady. Sonymen qatar majar tili túrki tilderine jata ma, álde fın-ýgor tildik tobyna ma degen búginge deıin ózektiligin joǵaltpaǵan ǵylymı pikirtalasty da alǵashqylardyń biri bolyp kótergen edi. Onyń eńbekteri Majarstan men Ortalyq Azııa halyqtary arasyndaǵy rýhanı baılanystyń berik negizin qalady. Sonyń arqasynda qazaqtar men majarlar arasyndaǵy týystyq sezim búginge deıin saqtalyp otyr», dedi Majarstannyń Qazaqstandaǵy Tótenshe jáne О́kiletti Elshisi Otto Ivan Rona.
Kórmede Batys etnograftary, shyǵystanýshylary, saıahatshylary men lıngvısteriniń kózqarastary arqyly Ortalyq Azııanyń tarıhı murasyn keńinen nasıhattaý kózdeldi.
«Armınıýs Vamberıdiń Ortalyq Azııaǵa jasaǵan saıahaty ártúrli órkenıetter arasyndaǵy ózara túsinistikke jańa jol ashty. Osy tarıhty ýnıversıtet qabyrǵasynda bólise alǵanymyzǵa biz erekshe qýanyshtymyz. Maqsut Narikbayev University-de biz zertteýshilik rýhty, pikir almasý jáne tarıhqa degen qurmetti joǵary baǵalaımyz. Osyndaı mádenı bastamalardy qoldaý – bizdiń halyqtar arasyndaǵy kópirlerdi nyǵaıtý jáne stýdentterimizdi óz murasyn ǵana emes, álemdik mádenıetterdiń baılyǵyn da baǵalaýǵa shabyttandyrý jolyndaǵy keń mindetterimizdiń bir bóligi», dedi MNU Provosty Sergeı Pen.
