Foto: gov.kz
N.Baıtilesov marketpleısterdi satýshylar týraly tolyq aqparatty jarııalaýǵa mindetteý jáne tutynýshylar men quqyq ıelerine sotqa ne satýshyǵa, ne marketpleıske júginý quqyǵyn berýdi usyndy. Depýtattyń aıtýynsha, marketpleısterde satýshy týraly tolyq aqparattyń bolmaýy tutynýshylardyń quqyǵyn shektep otyr.
«Marketpleısterde satýshy týraly zańdy aqparat (ataýy, mekenjaıy, BSN) kórsetilmeıtin jaǵdaılar jıi kezdesedi. Mysaly, dástúrli bólshek saýdada satýshy zańdy ataýyn jáne zańdy mekenjaıyn kórsetýge mindetti bolsa, marketpleısterdegi satýshylar taýar kartochkalarynda kóbinese tek telefon nómiri men fırmalyq ataýǵa sáıkes kelmeıtin ataý ǵana kórsetiledi. Bul málimetterdiń bolmaýy sotqa júginý múmkindigin shekteıdi», dedi ol.
Qazirgi tańda taýar tańbalary kóbinese zańsyz túrde ınternet-dúkenderde, domendik ataýlarda, áleýmettik jelilerde, sondaı-aq qyzmet kórsetý barysynda keńinen qoldanylyp jatyr. Osy jaǵdaıǵa nazar aýdarǵan májilismen quqyq ıelerine zańsyz paıdalanylǵan tańbalardy joıýǵa, sondaı-aq zańsyz ataýlardy tirkeýden alyp tastaýǵa zańdy quqyq berýdi usyndy.
«Mundaı zań tetikterin engizý tutynýshylardy jańylystyrýdyń jolyn kesýge, ınternet-alaıaqtyqtyń aldyn alýǵa múmkindik beredi. Sonymen qatar, taýar tańbalaryn qorǵaý jáne kontrafaktilik ónimdermen kúresýdiń tıimdi mehanızmderiniń bolýy – ınvestısııalyq tartymdylyqtyń mańyzdy kórsetkishi», deıdi N.Baıtilesov.
Depýtat saýalynda kásipkerlik ortanyń sapasyn arttyryp, ınternet jelisindegi saýdany retteý jáne kontrafaktilik ónimdi ótkizýge qarsy kúresti kúsheıtý, tutynýshylardyń quqyǵyn qorǵaý maqsatynda mynadaı sheshimder qabyldaýdy surady:
- elektrondyq saýda alańdarynda satýshylar týraly tolyq zańdy aqparatty ornalastyrý týraly mindetteý; al buzylǵan jaǵdaıda-óz satýshylarynyń áreketteri úshin marketpleısterdiń ákimshilik jáne múliktik jaýapkershilik alýyn kózdeý;
- tirkelgen taýar belgileriniń zańdy ıelerine ınternet-resýrstardyń, marketpleısterdiń, elektrondyq saýda alańdarynyń ıelerinen zańsyz paıdalanylatyn taýar belgilerin alyp tastaýdy talap etýge quqyqtar berý;
- tutynýshylar men quqyq ıeleriniń quqyqtary buzylǵan jaǵdaıda josyqsyz satýshylarǵa da, marketpleısterge de sot arqyly talap qoıý quqyǵyn bekitý.
