Tarıhı kórme taǵylymy

Bul jıynnyń negizgi maq­saty – Batys etnograftary, shy­ǵystanýshylary, saıahatshylary men lıngvısteriniń kózqarastary arqyly Ortalyq Azııanyń tarıhı murasyn keńinen nasıhattaý. Kórme Majarstannyń Qazaq­stan­daǵy elshiligimen birlesip uıym­das­tyrylyp, tanymal majar shyǵys­tanýshysy jáne saıahatshysy Armı­nıýs Vamberıdiń eńbekterine arnaldy. Ekspozısııada onyń 1868 jyly jaryq kórgen «Ortalyq Azııaǵa saıahat» atty kitabynan sıfr­lanǵan fotomaterıaldar men tarıhı sýretter toptamasy qoıyl­dy. Kórmege Ǵylym jáne joǵary bilim mınıstrligi men Syrtqy ister mınıstrliginiń ókilderi, dıp­lo­matııalyq korpýs músheleri, tarıh­shylar, halyqaralyq sarapshylar jáne jýrnalıster qatysty.

«Armınıýs Vamberı – álem­dik túrkitanýdyń negizin qalaý­shylardyń biri. Onyń eńbekteri Majarstan men Ortalyq Azııa halyqtary arasyndaǵy rýhanı baılanystyń berik negizin qalady. Sonyń arqasynda qazaqtar men majarlar arasyndaǵy týystyq sezim búginge deıin saqtalyp otyr. Biz árqashan da osyndaı mańyzy zor kórmeler men rýhanı, mádenı bastamalarǵa qoldaý kórsetýge daıynbyz. Sebebi mundaı jıyndar eki el arasyndaǵy baılanys­ty nyǵaıtyp, stýdentterimizge óz eliniń baı murasyn tereń meńgerip, álemdik mádenıettermen tanysýǵa múmkindik beredi», dedi Majarstannyń Qazaqstandaǵy Tótenshe jáne ókiletti elshisi Otto Ivan Rona.

Is-sharada kórme qo­naq­­ta­ry sıfr­lanǵan arhıv materıal­darymen (National Geog­rap­hic) tanysyp, qazaq halqy­nyń ár kezeńdegi tarıhı sáti men máde­nıetin tamashalady.

Prezıdent janyndaǵy Qazaq­stannyń strategııalyq zertteýler ınstıtýtynyń dırektory Erkin Tuqymov ta óz oıyn bildirip, kórmeniń mańyzy men ózektiligine toqtaldy.

Aıta keteıik, Maqsut Narikbayev University-de jastardyń rýhanı-patrıottyq tárbıesine erekshe kóńil bólinedi. Bul baǵyttaǵy bas­ty jumystardyń biri – stýdent­terdiń «Qazaqstan tarıhy» pánin jańa formatta meńgerýi. Oqy­týdyń bul úlgisinde teorııalyq bilimmen qatar, elimizdiń tarıhı oryndaryna barý, sondaı-aq teatrlandyrylǵan qoıylymdarǵa qatysý syndy tájirıbelik elementter de qamtylǵan.