Sýretti túsirgen – avtor
12 adamdy jumyspen qamtydy
Azyq-túlikke paıdalanatyn polıetılen dorbalar suıytylǵan gaz túıirshikterinen óndirilse, qoqys shyǵarýǵa arnalǵan qara paketterdi qaıta óńdelgen polıetılennen jasaıdy. О́ndiris oshaǵynyń basshysy Baıjan Jaýǵasharovtyń aıtýynsha, qoldanylǵan eski selofan paketterdi turǵyndardan belgili somaǵa satyp alyp, qaıta balqytady, pishinin keltirip sozady. Munyń bárin avtomattandyrylǵan arnaıy qurylǵylar jasaıdy. Kásiporyn ıesi áýelde ártúrli paketti kóterme baǵamen satyp alyp, ústine ústeme qosyp, saýdalap kórgen. Saýdasy júre bastaǵan soń kólik tizgindegen. Tabandy eńbektiń arqasynda bul kúnde úlken kásip ashyp, 12 adamǵa jumys berip otyr.
– Kásipti bastamas buryn, satyp kórý kerek. Eger suranys bolsa, sol dúnıeni óndirýge bolady. Men ózim paket satýdy buryn bastadym. Turaqty tutynýshylarym bar. Suranys bolǵan soń nege ózimizde óndirmeske degen oı keldi. Nartáýekel dep, eki stanok satyp alyp, iske qostym. О́z-ózin aqtady, paıda túsire bastady. Sóıtip, keńeıe berdik. Ǵımaratty da óz kúshimmen kóterip aldym, – deıdi «Bereket» JShS basshysy Baıjan Jaýǵasharov.
Básekelesterdiń bárinen ozdy
Paket shyǵarý óndirisi dóńgeleı bastaǵan soń básekelester de paıda bolǵan. Alaıda áriptesteriniń kásibi uzaqqa barmaǵan kórinedi. О́ıtkeni Baıjan Jaýǵasharov bul naryqqa bárinen buryn keldi. Úzdiksiz jumys istep turǵan kásiporynnan kúnine 1 tonna paket shyǵady. Kóbine dorba men qulaqty paketter shyǵarady. Eń suranysqa ıesi osylar. Áıtpese, sehta turǵan stanoktar qyzyldy-jasyl pakettiń túr-túrin shyǵarýǵa qaýqarly. Sonyń ózinde qaladaǵy naryqtyń 20%-yn otandyq ónimmen qamtamasyz etip otyr.
– Saýda-sattyqpen aınalysqandyqtan polıetılen paketterdi kúndelikti qoldanamyz. Tutynýshylarymyzǵa alǵan azyq-túlikterin osyndaı paketke salyp beremiz. Otandyq ónim bolǵandyqtan ǵana emes, sapasy da unaıdy. Onyń ústine, jaqyn jerden alyp otyramyz, – deıdi jeke kásipker Botakóz Baqytbekqyzy.
Sapaly ónimge suranys mol
Polıetılen paketterin óndirý birneshe kezeńnen turady. Stanoktar avtomatty bolǵanymen, báribir maman qolyn qajet etedi. Eń birinshi polıetılen túıirshikterin arnaıy rezervýarlarǵa salyp, belgili bir temperatýrada balqytady. Qajet bolǵan jaǵdaıda túster men beriktik qasıetterin arttyrý úshin qospalar qosylady. Balqytylǵan polıetılen ekstrýder qurylǵysy arqyly juqa plenka túrinde qalyptasady. Ol joǵary temperatýrada sozylyp, juqartylady. Osy kezeńde plenkaǵa túrli túster nemese logotıpter basylýy múmkin. Qalyptasqan polıetılen plenkasy rolıkter arqyly salqyndatylyp, qajetti pishinge keltiriledi. Keıin ol úlken oramdarǵa jınalady nemese naqty ólshemder boıynsha kesilip daıyndalady. Kesilgen plenkadan paketterdiń túpkilikti formasy jasalady. Paketterdiń túrine baılanysty, olardyń júk kóterý múmkindigi tekseriledi. Daıyn bolǵan paketter sapa baqylaýynan ótkiziledi. Keıin olar qaptalyp, satý oryndary men tapsyrys berýshilerge jóneltiledi. Bul jumystarǵa mamandar ábden mashyqtanyp alǵan. Olar shıkizat sapasyn, temperatýralyq rejimdi jáne plenka qalyńdyǵyn qadaǵalaıdy.
– Apparattyń barlyǵyn ózimiz retteımiz. Pakettiń ólshemi, temperatýrasy qolmen qoıylady. Barlyǵyn rettep alǵan soń, avtomatty túrde ónimdi shyǵara beredi. Al jalaqymyz jumysymyzdyń kólemine qaraı ýaqtyly tólenedi, – deıdi osy kásiporynda bes jyldan beri jumys istep kele jatqan tájirıbeli maman Serik Jumabekov.
«Bereket» JShS shyǵaryp otyrǵan paketter arzan ári kúndelikti turmysta qoldanylady. Sondyqtan suranys kemimeıdi. Onyń ústine sapasyna syn joq. Qulaqty paketteri 5-15 kıloǵa deıin júk kóteredi. Qoqysqa arnalǵan paketter tipten myqty.
Kelesi kezeń – plastık bótelkeden qubyr shyǵarý
Baıjan Jaýǵasharovtyń endigi oıy – plastık bótelkelerdi qaıta óńdep, qubyr shyǵarý. Ol bir jaǵynan kásip kózi desek, ekinshi jaǵynan tabıǵatqa shashylatyn polıpropılen bótelkelerdiń azaıýyna sep bolady. Eger qubyr shyǵaratyn stanok qoıylsa, turǵyndar qoqysqa tastaıtyn bótelkelerdi jınastyryp, atalǵan kásiporynǵa aparyp ótkizýleri ábden múmkin. Osylaısha, aınala zııandy qaldyqtardan tazalana bermek.
Bul ázirge jospar. Dese de, júzege asýy ábden múmkin. Kásiptiń qyr-syryn ábden meńgergen Baıjan aldymen qubyrlardy kóterme baǵamen satyp alyp, qaıta satyp kóredi. Eger suranys joǵary bolsa, arnaıy qurylǵylar alyp, ózi óndiredi. Ázirshe, paketten paıda taýyp otyr.
Shyǵys Qazaqstan oblysy
