Foto – avtordan
Baıanaýyl aýdandyq sotynda Maıqaıyń altyn kenishinde 4 qutqarýshynyń ólimine sebepker bolǵan qaıǵyly oqıǵa boıynsha qylmystyq istiń negizgi prosesteri ótip jatyr.
Sotta marqum qutqarýshy Oleg Tyshkevıchtiń qyzy Iаna Osolodkova kýáger retinde oqıǵaǵa qatysty ózi biletin jaıttarmen bólisti. Iаnanyń aıtýynsha, ol ákesimen sol kúngi qaıǵyly oqıǵadan jarty saǵat buryn sóılesken.
«Ákem marqum telefon arqyly sóıleskenimizde óziniń bul kúni rezervtik quramda bolǵanyn, demalys bólmesinde tynyǵyp otyrǵanyn aıtqan edi. Onyń qalaısha oqıǵa ornyna barýǵa pármen alǵany men úshin túsiniksiz. Bir sózben aıtqanda, ol oıyqqa qulaǵan álgi avtobýs salonynda bolýǵa tıis emes edi. Ákemdi jáne janyndaǵy serikterin apat ornyna zańsyz jibergen dep esepteımin. Olar jaýapsyzdyqtyń qurbany boldy. Al qyrshyn ketken Sarqyt Berdiqan degen jas jigittiń (1999 jyly týǵan) ondaı apattyq oqıǵaǵa baratyndaı tájirıbesi bolmaǵan. Jaqynda ǵana jumysqa turǵandyqtan ol kúrdeli qutqarý operasııalaryna tipti úıretilmegen kórinedi. Al jumys berýshi - Kásibı áskerılendirilgen avarııalyq-qutqarý qyzmetteriniń respýblıkalyq ortalyq shtabynda (KÁAQQ ROSh) qyzmetkerlerin mundaı iske úıretýge ruqsat beretin tıisti lısenzııasy joq ekenin anyqtadym. Sondyqtan bul jerde úlken zańsyzdyq bolǵan. Men bul sotta KÁAQQ uıymynyń da jaýapqa tartylýyn suraımyn», dedi sotta Iаna Osolodkova.
Iаnanyń sózinshe, marqum ákesi jumysta únemi qutqarýshylardyń jetispeıtinine, tehnıkalardyń eskiligine shaǵymdanǵan. Onyń ústine arnaıy kıimderi de tozyǵy jetken, nashar kúıde bolǵan kórinedi.
«Avtobýsta arnaıy quraldardy qoıyp, respırator da bolmaǵan. «KÁAQQ ROSh» JShS jumys berýshi retinde qyzmetkerleriniń qaýipsizdigine jaýap berýi tıis. Alaıda men sotta olarǵa qatysty aıyptaý aktilerin kórmeı otyrmyn. Atalǵan qutqarý uıymyn jaýapqa tartý, tergeý júrgizý týraly óńirlik antıkor qyzmetine, prokýratýraǵa shaǵym túsirgenmin. Olardyń nátıjesi bolady degen úmittemin», dep qosty Iаna Osolodkova.
