15 maýsym kúni Atlantada ótetin UFC on ESPN 69 týrnırinde Kamarý Ýsman men Hoakın Baklı arasyndaǵy jekpe-jekke qatysty uıymnyń eks-chempıony Danıel Korme pikir bildirdi. Onyń aıtýynsha, bul kezdesý Ýsman úshin sheshýshi sát bolmaq.
- Menińshe, bul óte jaqsy aıqas jáne ol Kamarý Ýsmannyń áli de nege qaýqarly ekenin kórsetedi. Baklıdi jeńý Ýsmanǵa jańa serpin berýi múmkin. Ýsman áli de dıvızıondaǵy eń tanymal esim. Eger ol jeńse, ashyq aıtyp talap qoıa alady: 'Belal Mýhammed, Djek Della Maddalena, maǵan múmkindik berińder!' Ásirese, eger Shavkat Rahmonov jaraqatynan aıyqpaǵan bolsa – onda olar mindetti túrde ony estıdi. Bul Ýsman úshin sońǵy múmkindik deýge bolady, – dedi Korme Cheıl Sonnenmen birge júrgizetin Good Guy/Bad Guy shoýynda.
Hoakın Baklı sońǵy jekpe-jegin 2024 jyldyń jeltoqsanynda UFC on ESPN 63 týrnırinde Kolbı Kovıngtonǵa qarsy ótkizdi. Ol tehnıkalyq nokaýtpen jeńiske jetip, kásibı mansabyndaǵy 21-shi jeńisine qol jetkizdi. Onyń enshisinde – 6 jeńilis bar.
Kamarý Ýsman bolsa, oktagonǵa sońǵy ret 2023 jyldyń qazanynda shyqqan. UFC 294 týrnırinde ol Hamzat Chımaevpen tolyq úsh raýndtyq aıqas ótkizip, tóreshiler sheshimimen jeńilip qalǵan edi. Ýsmannyń rekordy – 20 jeńis, 4 jeńilis.
Atalmysh kezdesý – tıtýldyq jekpe-jekke aparar mańyzdy baspaldaqtardyń biri. UFC-diń bul salmaǵyndaǵy jaǵdaı Shavkat Rahmonovtyń jaraqatyna baılanysty belgisiz kúıde turǵan shaqta, Ýsman men Baklıdiń jeńisi úlken mánge ıe bolmaq.
