Jastar bıznesi – úlken arenada

Bireýge jaı ǵana kórme sekildi kórinýi múmkin, al shyn máninde, bul – armandar alańy. Astanada ótken «ENACTUS Kazakhstan National Expo 2025» – elimizdiń túkpir-túkpirinen jınalǵan myńdaǵan jasqa kásipkerlikke qadam, óz ıdeıasyn álemge kórsetý múmkindigi boldy.

Álemniń 35 elinde jumys isteıtin halyqaralyq baǵdar­lama 50 jyl boıy stýdenttik kásipkerlikti damytyp keledi. Jyl saıyn baǵdarlamaǵa 1 800 ýnıversıtetten 72 myńnan asa jas qatysady. Osy ýaqytqa deıin ENACTUS aıasynda 4 myńnan asa joba júzege asyrylǵan. Maqsaty – kásipkerlik arqyly qoǵamdy jaqsy jaǵyna ózgertý. Elimiz de – osy qozǵalystyń bel­sendi músheleriniń biri.

Qatysýshylardy quttyqtaǵan Premer-mınıstrdiń orynbasary Ermek Kósherbaev bul bastamanyń jastar áleýetin arttyrýdaǵy mańyzyna toqtaldy.

«30 jyl ishinde qozǵalys myńdaǵan jasty biriktirip, olardyń kóshbasshylyq qabile­tin ashýǵa, kásipkerlik áleýetin júzege asyrýǵa múmkindik berdi. Memleket ENACTUS qozǵaly­syn jastardyń múmkindigin ashý­ǵa, batyl ıdeıalaryn júzege asyrýǵa jáne kásibı mansabyn sátti bastaýyna jaǵdaı jasaýǵa baǵyttalǵan bastama retinde qoldaıdy. Sizder – jańa býyn ókilderi, elimizdegi ınnovasııalardyń qozǵaýshy kúshi bolyp, tabysty startaptar quryp, elimizdiń turaqty damýyn qamtamasyz etesizder», dedi E.Kósherbaev.

Bıylǵy ENACTUS kórme­si­ne tek ýnıversıtet stýdent­teri emes, mektep oqýshylary men kolledj stýdentteri de joba­­laryn usyndy. Arnaıy mek­tep­aralyq chempıonat – «ENACTUS NextGen», kolledj­der arasyndaǵy respýblıkalyq kýbok, sondaı-aq 5-8-synyp oqý­shylaryna arnalǵan pıtchıng alańy uıymdastyryldy.

Kórme kezinde birneshe baǵyt qatar jumys istedi: jastar­dyń ınnovasııalyq jobalary tanys­tyryldy, bilim uıymdary baǵ­darlamalaryn kórsetti, tu­raqty damý maqsattaryna arnal­ǵan forým ótti. Buryn ENACTUS-ta bolǵan túlekter tájirıbeleri­men bólisken bıznes-sessııalar uıymdastyryldy.

Baıqaý jeńimpazy elimiz­diń atynan Taılandta ótetin «ENACTUS World Cup 2025» chempıonatyna qatysady.

«Atameken» UKP basshysy Raıymbek Batalovtyń aıtýynsha, jastarǵa múmkindik berý arqyly búkil qoǵamdy jáne ekonomıkany ózgertýge bolady.

– Elimiz álemde birinshi bolyp dástúrli stýdenttik baǵdar­lama­men qatar ENACTUS mek­tep baǵ­darlamasyn ázir­leý­ge kiris­ti. ENACTUS, bız­nes jáne mem­leket arasyn­daǵy tıimdi yn­tymaqtastyq­tyń mańyzdyly­ǵyn atap ótkim keledi. Mundaı yntymaqtastyq­tyń tek shaǵyn bıznesti qoldaý salasynda ǵana emes, sonymen qatar jahandyq maqsattarda da bolashaǵy zor. Bul barlyq tarapqa naqty paıda ákeletin baǵyt, – dedi R.Batalov.